សារព័ត៌មាន នគរវត្ត តែងតែនាំមុខគេជានិច្ច
ប្រទេសរុស្ស៊ីបានពង្រឹងទំនាក់ទំនងយោធា សេដ្ឋកិច្ច សហប្រតិបត្តិការជាមួយប្រទេសវេណេហ្ស៊ុយអេឡា ដើម្បីជួយប្រទេសអាមេរិកខាងត្បូងមួយនេះតទល់ជាមួយកំណើនការគាបសង្កត់ពីសហរដ្ឋអាមេរិក ។
រដ្ឋមន្ត្រីក្រសួងការបរទេសរុស្ស៊ី លោក សឺហ្គេយ ឡៅរ៉ូវ បានថ្លែងបែបនេះ ខណៈជួបជាមួយប្រធានាធិបតីវេណេហ្ស៊ុយអេឡា នីកូឡាស់ ម៉ាឌូរ៉ូ នៅទីក្រុង ការ៉ាកាស ។ នេះបើតាមការផ្សាយរបស់ប្រភពប៊ីប៊ីស៊ីថ្ងៃទី៨ ខែកុម្ភៈ ឆ្នាំ២០២០ ។
លោករដ្ឋមន្ត្រី ឡៅរ៉ូវ បានបញ្ជាក់ថា ការប៉ុនប៉ងណាមួយដើម្បីបណ្តេញរដ្ឋាភិបាលរបស់លោក ម៉ាឌូរ៉ូ ដោយកងកម្លាំង គឺមិនអាចទទួលយកបានឡើយ ។
សហរដ្ឋអាមេរិកបានចោទប្រកាន់លោក ម៉ាឌូរ៉ូ ថាដឹកនាំរដ្ឋាភិបាលប្រកបដោយអំពើពុករលួយ ហើយជារបបដឹកនាំប្រកបដោយអំពើឃោរឃៅថែមទៀតផង។
កាលពីព្រឹកថ្ងៃទី៧ ខែកុម្ភៈ ឆ្នាំ២០២០ សហរដ្ឋអាមេរិកបានដាក់ទណ្ឌកម្មទៅលើវេណេហ្ស៊ុយអេឡា ក្រុមហ៊ុនអាកាសចរណ៍គ្រប់គ្រងដោយរដ្ឋ Conviasa ។ អាមេរិកបានសំអាងថា ក្រុមហ៊ុននេះត្រូវបានរដ្ឋាភិបាលប្រើប្រាស់ដើម្បីបិទបាំងអំពើពុករលួយរបស់មន្ត្រីរបស់ខ្លួន ។
ទីក្រុងវ៉ាស៊ីនតោនបាននិងកំពុងគាំទ្រមេដឹកនាំប្រឆាំងវេណេហ្ស៊ុយអេឡា លោក Juan Guaido ដែលកាលពីឆ្នាំកន្លងហើយបានប្រកាសតាំងខ្លួនឯងថាជាប្រធានាធិបតីបណ្តោះអាសន្ន ។
ក្នុងសប្តាហ៍នេះ លោក Guaido បានក្លាយជាភ្ញៀវពិសេសរបស់លោកដូណាល់ ត្រាំ ប្រធានាធិបតីអាមេរិកក្នុងឱកាសឡើងថ្លែងអំពី«ស្ថានភាពប្រទេសជាតិ»(State of Union)នោះផងដែរ ។
ប្រមុខការទូតរុស្ស៊ីបានថ្លែងថា «យើងសូមសម្តែងការគាំទ្រទាំងស្រុងចំពោះអធិបតេយ្យវេណេហ្ស៊ុយអេឡា, សាមគ្គីភាពជាមួយមេដឹកនាំ និងប្រទេសនេះក្នុងការប្រយុទ្ធប្រឆាំងការគាបសង្កត់ខុសច្បាប់ដែលបាននិងកំពុងអនុវត្តឡើងដោយអាមេរិក ហើយនិងសម្ពន្ធមិត្តរបស់ខ្លួន» ៕
