សារព័ត៌មាន នគរវត្ត តែងតែនាំមុខគេជានិច្ច
បុរសម្នាក់ត្រូវបានចាប់ខ្លួននៅខាងក្រៅសេតវិមាន ក្រោយពីរូបគាត់បានប្រាប់កងកម្លាំងសន្តិសុខសម្ងាត់អាមេរិកមួយរូបថា រូបគេមានបំណងសម្លាប់លោកដូណាល់ ត្រាំ ប្រធានាធិបតីអាមេរិកទី៤៥។ នេះបើតាមការផ្សាយរបស់សារព័ត៌មាន standard កាលពីថ្ងៃទី១០ ខែកុម្ភៈ ឆ្នាំ២០២០។
ប៉ូលិសនៅទីក្រុងវ៉ាស៊ីនតោនឌីស៊ីបានបញ្ជាក់ប្រាប់ប្រភពព័ត៌មានផ្សាយថា បុរសឈ្មោះ Roger Hedgpeth អាយុ២៥ឆ្នាំ ត្រូវកម្លាំងសន្តិសុខចាប់ខ្លួនកាលពីរសៀលថ្ងៃទី៨ ខែកុម្ភៈ ក្រោយពីការគំរាមកំហែងដល់ប្រធានាធិបតីសហរដ្ឋអាមេរិក ។
មន្ត្រីប៉ូលិសសម្ងាត់ម្នាក់ដែលបាននិងកំពុងល្បាតនៅខាងក្រៅសេតវិមាន នៅពេលដែលលោក Hedgepeth ត្រូវបានចូលប្រកាន់ថាចូលទៅកាន់ទីនោះដោយខុសច្បាប់បានបញ្ជាក់ថា រូបគាត់ (Hedgepeth)មកទីនេះក្នុងបំណង «ធ្វើឃាត» លោក ត្រាំ ។
សារព័ត៌មាន AP បានទទួលរបាយការណ៍ពីប៉ូលិសបានបញ្ជាក់ថា បុរសអាយុ២៥ឆ្នាំ Roger Hedgpeth បានបញ្ជាក់ថា «ខ្ញុំមានកាំបិតមួយដើមជាប់មកជាមួយខ្លួនផងដែរ» ហើយប៉ូលិសក៏បានរកឃើញកាំបិទមួយដើមនោះប្រាកដមែន លាក់ទុកនៅត្រង់ត្រគាកខាងឆ្វេងរបស់គេ ។
ប៉ូលិសបញ្ជាក់ថា បុរសសង្ស័យរូបនេះ មកពីទីក្រុង Brandon រដ្ឋ ផ្ល័រីដា សហរដ្ឋអាមេរិក ។ ប៉ូលិសបានរកឃើញប្រដាប់ប្រដាកាំភ្លើងខ្លីនៅត្រង់ត្រគាកខាងស្តាំរបស់គាត់ផងដែរ ។
ប៉ូលិសបានពណ៌នានៅក្នុងរបាយការណ៍បញ្ជាក់ថា បុរសរូបនេះជាមនុស្សមានរោគចិត្តធ្ងន់ធ្ងរ ។ ប៉ុន្តែគេមិនដឹងថា បុរសរូបនេះមានអការជំងឺនេះរយៈពេលវែងប៉ុណ្ណាហើយនោះទេ និងមិនដឹងថា តើបុរសរូបនោះមកកាន់ទីក្រុងវ៉ាស៊ីនតោនឌីស៊ីបានដោយរបៀបណាឡើយ ។
ប៉ូលិសបានសង្កត់ធ្ងន់ថា បុរស Hedgpeth ត្រូវបញ្ជូនចូលកាន់មន្ទីរឃុំឃាំងបណ្តោះអាសន្ន មុនពេលបញ្ជូនបន្តទៅកាន់មន្ទីរពេទ្យផ្នែករោគចិត្តដើម្បីពិនិត្យវិនិច្ឆ័យបន្ត ៕
