ប្រធានាធិបតីចិន ៖ សង្គ្រាមប្រឆាំងវីរុសកូវីដ-១៩ កាន់តែល្អប្រសើរ

ប្រធានាធិបតីចិន លោកស៊ី ជីនពីង បានប្រកាសថា សង្គ្រាមប្រឆាំង វីរុសកូវីដ-១៩ នៅក្នុងប្រទេសចិន បានឆ្ពោះទៅមុខ ហើយកំពុងទទួលបានជោគជ័យជាបន្តបន្ទាប់ ។ ការលើកឡើងរបស់ប្រធានាធិបតីចិន ក្នុងពេលដែលចំនួនអ្នកឆ្លង និងស្លាប់ ថយចុះជាច្រើន មិនធ្លាប់មាន ។

នៅក្នុងជំនួបពិភាក្សាតាមទូរស័ព្ទ ជាមួយនាយករដ្ឋមន្ត្រីអង់គ្លេស លោក Boris Johnson ប្រធានាធិបតី ស៊ី ជីនពីង បានបញ្ជាក់ថា សង្គ្រាម ប្រឆាំង កូវីដ-១៩ ឈានដល់ដំណាក់កាលសំខាន់ ហើយចិនកំពុងតែគ្រប់គ្រងស្ថានការណ៍បានទាំងស្រុង ។

ដោយចំនួនអ្នកស្លាប់ និងឆ្លងវីរុសកូវីដ-១៩ថយចុះ ទីផ្សា មូលបត្រ(ភាគហ៊ុន)នៅទ្វីបអាស៊ី និងអាមេរិក ចាប់ផ្តើមកើនឡើងវិញហើយ ក្រោយពេលប្រធានាធិបតីចិនប្រកាសពីការគ្រប់គ្រង ការឆ្លងរាលដាលនៃវីរុសកូវីដ-១៩ យ៉ាងមានប្រសិទ្ធភាព ។ អគ្គនាយកមូលនិធីរូបិយវត្ថុអន្តរជាតិ លោកKristalina Georgievaបានលើកឡើងថា សេដ្ឋកិច្ចចិន នឹងដំណើរការល្អប្រសើរឡើងវិញ ប្រសិនបើការគ្រប់គ្រង វីរុសកូវីដ-១៩បានទាំងស្រុងហើយនោះ ។

គិតមកដល់ព្រឹកថ្ងៃទី ២០ ខែកុម្ភៈនេះ ចំនួនអ្នកស្លាប់ដោយ វីរុសកូវីដ-១៩បានកើនឡើង ដល់២១២២នាក់ហើយ និង អ្នកឆ្លងវីរុសនេះមាន ៧៥ ៦៦០នាក់។ ក្រៅពីនេះ អ្នកផ្ទុកវីរុស ដែលបានព្យាបាលជាសះស្បើយ មាន១៤ ៤៥២នាក់ ផងដែរ។

ចំណែកនៅក្នុងខេត្ត ហូប៉ីវិញមន្ត្រីសុខាភិបាលខេត្ត បានបាញ្ជាក់ថា កាលពីថ្ងៃទី១៩ ខែកុម្ភៈ មានអ្នកស្លាប់ដោយវីរុសកូវីដ -១៩ ចំនួន១០៨នាក់ ប៉ុន្តែ ចំនួនអ្នកឆ្លងវីរុសនេះថយចុះយ៉ាងខ្លាំងបំផុត ដោយមានតែករណីឆ្លងថ្មីតែ៣៤៩នាក់ប៉ុណ្ណោះ បើប្រៀបធៀបនិងថ្ងៃទី១៨ មានដល់ទៅ ១៦០០នាក់ឆ្លងវីរុសនេះក្នុងរយៈពេលដូចគ្នា។ នេះជាការរឿងដ៏ល្អបំផុត ដោយចំនួនអ្នកឆ្លង ថយចុះមិនធ្លាប់មានចាប់តាំងពីថ្ងៃទី២៥ ខែមករា មកទល់ពេលនេះ។

ចំណែកចំនួនអ្នកស្លាប់ក៏ថយចុះដូចគ្នា ពី ១៣២នាក់ កាលពីថ្ងៃទី១៨ ខែកុម្ភៈ នៅសល់តែ ១០៨នាក់ប៉ុណ្ណោះនៅថ្ងៃទី១៩ ខែកុម្ភៈ។ គិតមកដល់ព្រឹកថ្ងៃទី២០ ខែកុម្ភៈនេះសរុប អ្នកផ្ទុកវីរុស កូវីដ-១៩ នៅក្នុងខេត្តហូប៉ីចំនួន៦២ ០៣១នាក់ ចំនួនអ្នកស្លាប់សរុប២០២៩នាក់ ។

ចំណែកនៅក្នុងប្រទេសជប៉ុន ស្ថិតនៅលំដាប់ទីពីរ បន្ទាប់ពីចិន ដោយមានអ្នកឆ្លងថ្មី៧៩នាក់ នៅលើនាវា Diamond Princess ធ្វើឲ្យចំនួនអ្នកឆ្លងកូវីដ-១៩ កើនឡើងដល់ទៅ៦២០នាក់។

ដោយឡែក ចំនួនអ្នកស្លាប់នៅខាងក្រៅប្រទេសចិន មាន ៨នាក់ ហើយអ្នកស្លាប់ថ្មីបំផុតមានពីរនាក់ គឺនៅប្រទេសអ៊ីរ៉ង់ កាលពីថ្ងៃទី១៩ ខែកុម្ភៈ។ ក្រៅពីនេះ នៅហុងកុង មានអ្នកស្លាប់២នាក់ កោះតៃវ៉ាន ម្នាក់ ជប៉ុនម្នាក់ហ្វីលីពីនម្នាក់ បារាំងម្នាក់ ៕