សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ កម្លាំងកងរាជអាវុធហត្ថស្រុកស្អាង សហការជាមួយអាជ្ញាធរមូលដ្ឋាន បានចុះបង្រ្កាបល្បែងស៊ីសងជល់មាន់ខុសច្បាប់កាលពីរសៀលថ្ងៃ សៅរ៍ ៧កើត ខែ ផល្គុន ឆ្នាំកុរ ព.ស.២៥៦៣ ត្រូវនឹង ថ្ងៃទី២៩ ខែកុម្ភៈ ឆ្នំា២០២០ នៅចំណុចព្រៃមាត់បឹងស្ថិតនៅភូមិសំរោង ឃុំក្រាំងយ៉ូវ ស្រុកស្អាង ខេត្តកណ្តាល ។
ប្រភពពីមន្រី្តកងរាជអាវុធហត្ថស្រុកស្អាងបានឲ្យដឹងថា ដោយមានប្រជាពលរដ្ឋរាយការណ៍ថា មានករណីលេងល្បែងជល់មាន់នៅចំណុចព្រៃមាត់បឹង សមត្ថកិច្ចកងរាជអាវុធហត្ថស្រុកស្អាងដឹកនាំដោយ លោកវរសេនីយ៍ត្រី អ៊ូ ផល្លី មេប៉េអឹមស្រុកស្អាង រួមនឹងកម្លាំងជិត១០នាក់ បានចុះទៅបង្រ្កាបល្បែងជល់មាន់នៅចំណុចខាងលើនេះហើយ សមត្ថកិចបានឃាត់ខ្លួនជនសង្ស័យ២នាក់រួមមាន ឈ្មោះ ហ៊ីម ស៊ុនឡាយ ភេទប្រុសអាយុ៤០ឆ្នាំ មានទីលំនៅភូមិសំរោង ឃុំ ក្រាំងយ៉ូវ ស្រុកស្អាងខេត្តកណ្ដាល ជាអ្នករុំខ្នាយមាន់ និងឈ្មោះ សៀង លាងហេងភេទប្រុស អាយុ៣៦ឆ្នាំ មានទីលំនៅ សង្កាត់បឹងទំពន់ ខណ្ឌមានជ័យ ភ្នំពេញ ជាអ្នកភ្នាល់ស៊ីលុយ ដើម្បីយកទៅចាត់ការតាមច្បាប់។ ក្រៅពីនេះមនុស្សជាច្រើននាក់រត់គេចខ្លួនដោយសុវត្ថិភាព ។ រីឯវត្ថុតាងចាប់យក រួមមានម៉ូតូចំនួន៥គ្រឿង មាន់ចំនួន៣ក្បាល ងាប់១ក្បាល ស្កុតសម្រាប់រុំជើងមាន់ចំនួន២០ដុំ និងជញ្ជីងថ្លឹងមាន់ចំនួន១ផងដែរ ៕ សហការី
