សារព័ត៌មាន នគរវត្ត តែងតែនាំមុខគេជានិច្ច
បរទេស ៖ ចិនជាប្រទេសដែលមានអ្នកឆ្លងនិងស្លាប់ច្រើនជាងគេបង្អស់នៅតំបន់អាស៊ី និងលើពិភពលោក ដោយសារតែវីរុសផ្លូវដង្ហើមប្រភេទថ្មី ហើយវីរុសនោះបានឆ្លងដល់ជាង៦០ប្រទេសជុំវិញពិភពលោក ។ ពេលនេះអ៊ីតាលី មានអ្នកឆ្លងនិងស្លាប់ច្រើនជាងគេក្នុងតំបន់ អឺរ៉ុប ចំណែកអ៊ីរ៉ង់ប្រចាំនៅតំបន់មជ្ឈិមបូព៌ា
ក្នុងរយៈពេលមួយថ្ងៃ គឺកាលពីថ្ងៃទី១ ខែមីនា ក្នុងប្រទេសអ៊ីតាលី មានអ្នកឆ្លងវីរុសផ្លូវដង្ហើម កើនឡើងដល់ទៅ៥០ភាគរយ ដោយពេលនេះមានអ្នកឆ្លងសរុបដល់ទៅ១៧០០នាក់ហើយនិងស្លាប់៣៤នាក់ ។ កាលពីថ្ងៃទី២៩ខែកុម្ភៈ គឺមានអ្នកឆ្លងតែ១១២៨នាក់ប៉ុណ្ណោះ ។
អ៊ីតាលីគឺជាប្រទេស ដែលមានចំនួនអ្នកឆ្លងកូវីដ-១៩ ច្រើនជាគេបំផុត ក្នុងតំបន់អឺរ៉ុប ។ តាមសារព័ត៌មាន CNN បានផ្សាយថា ក្រុមហ៊ុនអាកាសចរណ៍ Delta Airlines បានត្រៀមផ្អាករាល់ជើងហោះហើររវាងអាមេរិក និងទីក្រុង Milan នៅថ្ងៃទី៣ខែមីនា ក្រោយការហោះហើរជាលើកចុងក្រោយ។
រដ្ឋាភិបាលអ៊ីតាលីបានប្រកាសស្នើឲ្យពលរដ្ឋ ផ្អាក់រាលសកម្មភាព ដែលមានមនុស្សចូលរួមច្រើន ក្នុងនោះមានទាំង សិល្បៈ វិប្បធម៌ ដែលមានមនុស្សចូលរួម ច្រើន អាចបង្កឲ្យមានការឆ្លងរាលដាលកាន់តែខ្លាំង។
តំបន់ Lombardy ភាគខាងជើងអ៊ីតាលិគឺជា ទីតាំងនៃការផ្ទុះវីរុសផ្លូវដង្ហើម ខ្លាំងជាងគេបំផុត ដោយក្នុងចំណោមមនុស្ស១០នាក់មានម្នាក់ឆ្លង វីរុសកូវីដ-១៩។ តំបន់នេះមានពលរដ្ឋប្រមាណ១សែននាក់រស់នៅ ហើយត្រូវបានកាត់ផ្តាច់ពីតំបន់ផ្សេងៗ ដើម្បីទប់ស្កាត់ការឆ្លងរាលដាលកាន់តែខ្លាំង។
ដោយឡែកនៅក្នុងប្រទេសអ៊ីរ៉ង់វិញ បានបញ្ជូនក្រុមការងារ ដល់ទៅ៣សែននាក់ទៅត្រួតពិនិត្យនៅគ្រប់ទិសទី ក្នុងប្រទេសស្វែងរកអ្នកឆ្លងវីរុស កូវីដ-១៩ ប្រមូលមកដាក់ដោយឡែកដើម្បីទប់ស្កាត់ការឆ្លងរាលដាលកាន់តែច្រើនឡើង។
មកទល់ពេលនេះអ៊ីរ៉ង់ មានអ្នកស្លាប់ដោយ កូវីដ-១៩មាន ដល់ទៅ៥៤នាក់ហើយ និងឆ្លងវីរុស៩៧៨នាក់។រដ្ឋាភិបាលបានស្នើពលរដ្ឋកំចេញក្រៅផ្ទះ ចៀសវាងការឆ្លង។ក្នុងរយៈពេល២៤ម៉ោងនៅអ៊ីរ៉ង់មានអ្នកឆ្លង៣៨៥នាក់ និងស្លាប់១១នាក់៕ ម៉ែវ សាធី
