សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ កម្លាំងនគរបាលប៉ុស្តិ៍រដ្ឋបាលគោកចក បានឃាត់ខ្លួនជនសង្ស័យម្នាក់ ឈ្មោះ ង្វៀង ធីខា ហៅ សុខ ខា ភេទស្រី អាយុ៥៣ឆ្នាំ ជនជាតិវៀតណាម រស់នៅភូមិគីឡូម៉ែត្រលេខ៧ សង្កាត់ ស្វាយប៉ាកខណ្ឌ ឫស្សីកែវ រាជធានី ភ្នំពេញ មុខរបរលក់ត្រី ពាក់ព័ន្ធនឹងករណីអំពើលួចបន្លំខ្សែកមាសមួយខ្សែ ។
ការឃាត់ខ្លួនជនសង្ស័យខាងលើនេះប្រព្រឹត្តទៅនៅថ្ងៃ ពុធ ១១កើត ខែ ផល្គុន ឆ្នាំកុរ ព.ស.២៥៦៣ ត្រូវនឹងថ្ងៃទី៤ ខែមីនា ឆ្នាំ២០២០ វេលាម៉ោង៧និង៥០នាទី ព្រឹកស្ថិតនៅផ្សារដើមក្រឡាញ់ ក្នុងភូមិត្រពាំងសេះ សង្កាត់គោកចក ខេត្តសៀមរាប គ្រាដែលជនសង្ស័យរូបនេះលួចបន្លំយកខ្សែ.កកាឡៃដូយកខ្សែកមាសទម្ងន់១តម្លឹង។
មន្រ្តីនគរបាលប៉ុស្តិ៍រដ្ឋបាលគោកចក បានឲ្យដឹងថា មុនពេលកើតហេតុជនសង្ស័យខាងលើ បានធ្វើសកម្មភាពចូលទិញខ្សែក នៅតូបរបស់ជនរងគ្រោះឈ្មោះ លីម ហ៊ុយឃី ភេទស្រី អាយុ៣៧ឆ្នាំ រស់នៅភូមិវាល សង្កាត់គោកចក ក្រុង.ខេត្តសៀមរាប។ពេលនោះជនសង្ស័យបានឲ្យជនរងគ្រោះ យកខ្សែកមាសប្រភេទច្រវាក់ឆាប ទម្ងន់១ដំឡឹងពីក្នុងទូ មកឲ្យខ្លួន(ជនសង្ស័យ)មកមើលក្នុងបំណងដូចអ្នកទិញយកទៅប្រើប្រាស់ត្រឹមត្រូវ។ ប៉ុន្តែ ពេលជនសង្ស័យបានខ្សែកដែលជនរងគ្រោះឲ្យមើលនិងខណ:ជនរងគ្រោះមិនចាប់អារម្មណ៍នោះ ជនសង្ស័យក៏យកខ្សែកខ្លួន(ខ្សែកក្លែងក្លាយ)ប្រភេទច្រវាក់ឆាបដូចគ្នា ឲ្យទៅជនរងគ្រោះ រីឯខ្សែកពិត ជនសង្ស័យបានយកពាក់នៅនឹងក ដោយគ្របអាវជិត។ បន្ទាប់មក ជនសង្ស័យនឹងជនរងគ្រោះ ក៏បាននិយាយថ្លៃគ្នា តែមិនត្រូវធ្វើឲ្យជនសង្ស័យបានដើរគេចខ្លួនពីតូបលក់មាសភ្ឡាមៗ ។
ប្រភពដដែលបានឲ្យដឹងទៀតថា ក្រោយជនសង្ស័យដើរចេញផុតបន្តិច ជនរងគ្រោះបានទាញខ្សែកនេះមកពិនិត្យទើបដឹងថា មានលក្ខណ:ប្លែកដោយមានទម្ងន់ស្រាល ក៏ស្រែកឆោឡោឡើង។ ពេលនោះប្រជាពលរដ្ឋដែលនៅក្បែរនោះបានឃាត់ជនសង្ស័យនិងរាយការណ៍ជូនសមត្ថកិច្ចចុះទៅនាំខ្លួនជនសង្ស័យយកមកសួរនាំ។ក្រោយពីសួរនាំជនសង្ស័យខាងលើ ក៏បានសារភាពថាខ្លួនពិតជាបន្លំលួចខ្សែកមាសពីជនរងគ្រោះពិតប្រាកដមែន ។
បន្ទាប់មកសមត្ថកិច្ចដកហូតវត្ថុតាងរួមមាន ៖
១.ខ្សែកច្រវាក់ឆាបធ្វើអំពីលោហធាតុពណ៌លឿង (មាស) ប្រវែង ៧៧ស.ម ទម្ងន់១តម្លឹង (របស់ជនរងគ្រោះ)១ខ្សែ
២.ខ្សែកច្រវាក់ឆាបធ្វើអំពីលោហធាតុពណ៌លឿង(កាឡៃ) ០១ខ្សែប្រវែង ៤៤ស.ម ជារបស់ជនសង្ស័យ ។
៣.ខ្សែដៃច្រវាក់ឆាបលោហធាតុពណ៌លឿង(កាឡៃ) ប្រវែង ១៦.៥ស.ម ជារបស់ជនសង្ស័យ ។
៤.ក្រវិល១គូ លោហធាតុពណ៌លឿងមានត្បូងពណ៌ស ចំនួន ២គ្រាប់ ជារបស់ជនសង្ស័យ ។
ក្រោយកើតហេតុជនសង្ស័យត្រូវកម្លាំងសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តសៀមរាបដើម្បីធ្វើការផ្ដន្ទាទោសតាមច្បាប់ ៕ ប៊ុន រិទ្ធី
