ឆក់កាបូបគេបើកម៉ូតូបុកគូថរថយន្ដដួលត្រូវបានប្រជាពលរដ្ឋចាប់ខ្លួនប្រគល់ឲ្យសមត្ថកិច្ចចាត់ការ

កណ្ដាល៖  ជនសង្ស័យ២នាក់ ធ្វើសកម្មភាពលួចកាបួបលុយនារីម្នាក់កំពុងជិះម៉ូតូតាមដងផ្លូវ តែពុំបានសម្រេចជនសង្ស័យទាំង២នាក់ខាងលើនេះ បានបើកម៉ូតូបុកគូថរថយន្ដបណ្ដាលឲ្យដួលត្រូវប្រជាពលរដ្ឋជិតខាងធ្វើការចាប់ខ្លួន រួចប្រគល់ឲ្យសមត្ថកិច្ចចាត់ការតែម្ដង ។ ករណីនេះ បានកើតឡើងកាលពីវេលាម៉ោង១៦និង៣០នាទី ថ្ងៃទី១៨ ខែមីនា ឆ្នាំ២០២០ ត្រង់ចំណុចផ្លូវលេខ២០៦ ស្ថិតក្នុងភូមិដើមមៀន១ សង្កាត់ដើមមៀន ក្រុងតាខ្មៅ ខេត្តកណ្តាល ។
មន្រ្ដីនគរបាលក្រុងតាខ្មៅបានឲ្យដឹងថា ជនសង្ស័យមានគ្នា២នាក់ ទី១-ឈ្មោះ នឹង សុខា ភេទប្រុស អាយុ១៧ឆ្នាំ មានទីលំនៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យរាជធានីភ្នំពេញ ទី២-ឈ្មោះ ណុល ចិត្រា ភេទប្រុស អាយុ២៥ឆ្នាំ មានទីលំនៅភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ ។ ចំណែកនារីរងគ្រោះឈ្មោះ លីម ម៉ីស៊ាំង  អាយុ២១ឆ្នាំ មានទីលំនៅភូមិសង្កាត់កើតហេតុ ។ ដោយឡែកវត្ថុតាងដកហូតបានមាន៖ ម៉ូតូ១គ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ភ្នំពេញ ១GU-៥៦៥០(របស់ជនសង្ស័យ) ,កាបូបដៃ ពណ៌ទឹកប្រាក់ចំនួន១(របស់ជនរងគ្រោះ) ,លុយខ្មែរចំនួន២៩០០រៀល និងទូរសព្ទ័ដៃ២គ្រឿងរបស់ជនសង្ស័យ ។
ប្រភពដដែលបន្ដថា កាលពីពេលវេលាកើតហេតុខាងលើ ខណៈជនរងគ្រោះកំពុងជិះម៉ូតូតែម្នាក់ឯង តាមផ្លូវហើយកាន់កាបូបលុយនៅជាប់នឹងដៃ ភ្លាមនោះ ក៏ឃើញជនសង្ស័យ២នាក់ជិះម៉ូតូ១មួយគ្រឿង ដោយឈ្មោះ នឹង សុខា ជាអ្នកឌុប ចំណែកឈ្មោះ ណុល ចិត្រា អង្គុយខាងក្រោយ ហើយបានធ្វើសកម្មភាពឆក់កាបូបពីដៃជនរងគ្រោះ រួចព្យាយាមបើកម៉ូតូរត់គេចខ្លួនឆ្ពោះទៅរាជធានីភ្នំពេញ  តែនៅពេលបើកដល់ចំណុចមុខរោងចក្រតាក់ហ្វាត សង្កាត់ចាក់អង្រែលើ ខណ្ឌមានជ័យ ម៉ូតូជនសង្ស័យបានបើកបុកគូទរថយន្តគេ បណ្តាលឲ្យដួល ហើយត្រូវប្រជាពលរដ្ឋ និងសមត្ថកិច្ចប៉ុស្តិ៍ចាក់អង្រែលើចាប់ឃាត់ខ្លួនបានទាំង២នាក់ និងវត្ថុតាងពាក់ព័ន្ធ យកមកប្រគល់ឲ្យសមត្ថកិច្ចនគរបាលក្រុងតាខ្មៅចាត់ការតាមនិតិវិធីតែម្តង។
តាមចម្លើយសារភាពជនសង្ស័យ២នាក់ខាងលើបានប្រាប់ថា ពួកគេពិតជាបានធ្វើសកម្មភាពឆក់កាបូបលុយរបស់ជនរងគ្រោះខាងលើប្រាកដមែន ៕ ស្អាង ជ័យ