ភ្នំពេញ៖ រថយន្តឡិចស៊ីសLX៤៧០ មួយគ្រឿង ត្រូវបានប្រជាពលរដ្ឋប្រទះឃើញចតចោលតាមផ្លូវចំនួន៣ថ្ងៃមកហើយ ដោយមិនឃើញម្ចាស់មកយកត្រលប់ទៅវិញ ទើបពួកគាត់នាំគ្នារាយការណ៍ប្រាប់នគរបាលប៉ុស្តិ៍ទឹកថ្លា ចុះមកត្រួតពិនិត្យ ដើម្បីធ្វើការស្រាវជ្រាវរកម្ចាស់ អាចជាករណីលួច ឬក៏ករណីអ្វីផ្សេងទៀត ។
ហេតុការណ៍ភ្ញាក់ផ្អើលខាងលើនេះ បានកើតឡើងកាលពីរសៀល ថ្ងៃទី២០ ខែមីនាឆ្នាំ២០២០ ស្ថិតនៅចំណុចភូមិ សេប៉េសេ សង្កាត់ ទឹកថ្លា ខណ្ឌ សែនសុខ ភ្នំពេញ ។
តាមប្រភពពីមន្រ្តីប៉ុស្តិ៍នគរបាលរដ្ឋបាលទឹកថ្លា បានឲ្យដឹងថា ក្រោយទទួលព័ត៌មាន ពីប្រជាពលរដ្ឋ រាយការណ៍មកថាមានករណី រថយន្ត ០១គ្រឿង ម៉ាកឡិចស៊ីសLX៤៧០ពណ៌ខ្មៅ ពាក់ស្លាកលេខ កំពង់ចាម 2A-6668 ដែលបានចតទុកចោលនៅក្បែររបងផ្ទះប្រជាពលរដ្ឋ រយៈពេល ០៣ថ្ងៃមកហើយ ពុំឃើញម្ចាស់មកយកនៅទីតាំងកើតហេតុ ។ភ្លាមនោះកម្លាំងសមត្ថកិច្ចបានចុះទៅត្រួតពិនិត្យមើលជាក់ស្តែង ដើម្បីធ្វើការស្រាវជ្រាវរកម្ចាស់ អាចជាករណីលួច ឬក៏ករណីអ្វីផ្សេងទៀត ។
ក្រោយកើតហេតុ សមត្ថកិច្ចបានអូសយករថយន្តខាងលើនេះ យកទៅរក្សានៅទីស្នាក់ការប៉ុស្តិ៍ទឹកថ្លាបណ្ដោះអាសន្ន និងប្រកាសផ្សព្វផ្សាយស្វែងរកម្ចាស់រថយន្ត ដែលមានភិនភាគខាងលើ មកទទួលយករថយន្តត្រឡប់ទៅវិញ ដោយអាចទំនាក់ទំនងតាមរយះលេខទូរស័ព្ទ ០១២ ៩០៦ ០០១/ ០៧០ ៨៣៨ ៨៨៣ ៕ ស រស្មី
សារព័ត៌មាន នគរវត្ត តែងតែនាំមុខគេជានិច្ច
