ស្រ្តីជនជាតិចិនម្នាក់ត្រូវជនសង្ស័យឆក់កាបូបរងរបួសធ្ងន់

កណ្តាល៖ ជនសង្ស័យមិនស្គាល់អត្តសញ្ញាណឆក់កាបូបលុយស្ត្រីម្នាក់ជាជនជាតិចិន ខណៈកំពុងជិះម៉ូតូតាមដងផ្លូវ បណ្ដាលឲ្យស្រ្តីរងគ្រោះដួលបោកទៅនឹងផ្លូវរងរបួសធ្ងន់ ។ ករណីឆក់បានកើតឡើងនៅព្រលប់ថ្ងៃទី២៨ ខែមីនា ឆ្នាំ២០២០  លើផ្លូវលេខ១១៥ ស្ថិតនៅភូមិតាក្តុលខាងត្បូង សង្កាត់តាក្តុល ក្រុងតាខ្មៅ ខេត្តកណ្តាល ។
ស្រ្តីជនជាតិចិនដែលជនសង្ស័យឆក់កាបូបពុំទាន់ស្គាល់អត្តសញ្ញាណទេ ។ ចំណែកឯជនសង្ស័យមិនស្គាល់អត្តសញ្ញាណ គេចខ្លួនបាត់ស្រមោល ។
បើតាមព័ត៌មានកន្លែងកើតហេតុបានឲ្យដឹងថា  នៅមុនកើតហេតុ ស្រ្តីរងគ្រោះជាជនជាតិរូបនេះបានជិះម៉ូតូតាមបណ្ដោយផ្លូវលេខ១១៥ ខណៈមកដល់ចំណុចកើតហេតុ ស្រាប់តែមានជនសង្ស័យជិះម៉ូតូមកពីក្រោយ ហើយធ្វើសកម្មភាពឆក់កាបូបលុយស្រ្តីរងគ្រោះ បណ្ដាលឲ្យដួលរងរបួសធ្ងន់ ។ ក្រោយពីធ្វើសកម្មភាពរួច ជនសង្ស័យបានជិះម៉ូតូគេចបាត់ស្រមោល ។ ចំណែកឯស្រ្តីរងគ្រោះ ត្រូវបានបញ្ជូនទៅសង្រ្គោះនៅមន្ទីរពេទ្យក្រុងតាខ្មៅ ។
ចំពោះករណីនេះ សមត្ថកិច្ចកំពុងកសាងសំណុំរឿង ស្រាវជ្រាវរកជនសង្ស័យ ដើម្បីចាត់ការតាមនីតិវិធីច្បាប់ ៕ ស្អាង ជ័យ