សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ កម្លាំងកងរាជអាវុធហត្ថ បានចេញប្រតិបត្តិការ បង្ក្រាបឈើអាររួច ជាច្រើនម៉ែត្រគូប ដឹកតាមទូកនៅទន្លេ មេគង្គ ក្នុងស្រុកសម្បូណ៌ ខេត្តក្រចេះ ដែល គេដឹងថា ឈើនោះជារបស់ឈ្មួញឈ្មោះ ចាន់ ម៉េងហាំង ហៅចាន់ ដែលសព្វថ្ងៃជា ឈ្មួញឈើតែម្នាក់គត់នៅខេត្តក្រចេះ។ ប្រតិបត្តិការនេះធ្វើឡើងកាលពីវេលាម៉ោង១១ ថ្ងៃអាទិត្យ ៦កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែមីនា ឆ្នាំ២០២០ ដោយកម្លាំងកង រាជអាវុធហត្ថខេត្តក្រចេះ។ បើតាមសេចក្តីរាយការណ៍បានឲ្យដឹង ថា ឈើនោះត្រូវបានឈ្មួញដឹកចេញពីភូមិ រមួល និងភូមិអាចេន ស្ថិតក្នុងតំបន់ព្រៃឡង់ ក្នុងស្រុកសម្បូណ៌ ខេត្តក្រចេះ។ ឈ្មួញឈ្មោះ ចាន់ ម៉េងហាំង ដឹកឈើទាំងតាមផ្លូវគោក និងផ្លូវទឹក យកទៅលក់នៅខេត្តត្បូងឃ្មុំ និងខេត្តព្រៃវែង។ ជាក់ស្តែងទូកដឹកឈើ ខាងលើ បានធ្វើចរាចរណ៍ជាញឹកញាប់ ប៉ុន្តែនៅថ្ងៃកើតហេតុនោះ ដោយសារតែ ទូកដឹកឈើជាប់កឿង នៅកណ្តាលទន្លេ មេគង្គតាំងពីម៉ោង៨ និង៣០នាទីយប់ថ្ងៃទី២៨ ខែមីនា រហូតដល់ម៉ោង៩ព្រឹកថ្ងៃទី ២៩ ខែមីនា គឺពុំមានសមត្ថកិច្ចណា ជា ពិសេសមេព្រៃថ្មគ្រែ ដែលមានទីស្នាក់ការ នៅមាត់ទន្លេនោះ ចាត់វិធានការបង្ក្រាបនោះ ឡើយ។ ដោយសារតែមានអ្នកកាសែតសួរនាំ ច្រើនពេក ទើបកម្លាំងកងរាជអាវុធហត្ថ ខេត្តក្រចេះ ចុះទៅចាប់ឈើរបស់ឈ្មួញ ចាន់ ម៉េងហាំង ដែលកឿងនៅកណ្តាល ទន្លេនោះ នាវេលាម៉ោង១១ព្រឹក ថ្ងៃទី២៩ ខែមីនា ឆ្នាំ២០២០។ លោក អឹុម ចិត្រា មេបញ្ជាការកងរាជ អាវុធហត្ថ ស្រុកចិត្របុរី បានឲ្យដឹងថា កម្លាំងកងរាជអាវុធហត្ថ សហការជាមួយ រដ្ឋបាលព្រៃឈើថ្មគ្រែ ចុះបង្ក្រាបទូកដឹក ឈើមួយគ្រឿង ដែលផ្ទុកឈើអារ ប្រភេទ ឈើក្រហមជាច្រើនម៉ែត្រគូប ប្រគល់ឲ្យ មេព្រៃថ្មគ្រែ ចាត់ចែងបន្ត។ លោក បាន បន្តថា កម្លាំងសមត្ថកិច្ចបានបង្ក្រាបពួក ឈ្មួញដឹកឈើ ដែលធ្វើសកម្មភាពល្មើស ច្បាប់ទាំងកណ្តាលថ្ងៃ។ បើតាមប្រភពព័ត៌មានបានឲ្យដឹងថា ឈ្មួញ ចាន់ ម៉េងហាំង ជាអ្នករកស៊ីឈើធំ មួយនៅខេត្តក្រចេះ។ កាលពីមុនលោក ជាអ្នករកស៊ីឈើនៅឯខេត្តស្ទឹងត្រែង។ បច្ចុប្បន្នមករស់នៅក្នុងសង្កាត់ក្រគរ ក្រុង ក្រចេះ។ សមត្ថកិច្ចគ្រប់លំដាប់ថ្នាក់ក្នុង ខេត្តក្រចេះត្រូវគេអះអាងថា បានទទួល លាភសក្ការ ផលប្រយោជន៍ ពីលោក ចាន់ ម៉េងហាំងនោះ គ្រប់ស្ថាប័ន។ រីឯការចាប់ ឈើលើទូក កាលពីថ្ងៃទី២៩ ខែមីនានោះ ក៏ព្រោះតែដោយសារទូកដឹកឈើនោះកឿង នៅកណ្តាលទន្លេ ដែលប្រជាពលរដ្ឋសុទ្ធ តែមើលឃើញទាំងអស់គ្នា ដូច្នេះបើមិន បង្ក្រាបទេ វាហាក់ដូចជាអាក្រក់មើលពេក។ ជាក់ស្តែង នៅមុខទូកដឹកឈើកឿងនោះ គឺជាស្នាក់ការរដ្ឋបាលព្រៃឈើថ្មគ្រែ។ គេ ខ្សឹបខ្សៀវគ្នាថា ពួកមេព្រៃនៅថ្មគ្រែ ទទួល បានផលប្រយោជន៍ច្រើនណាស់មើលទៅ ពីឈ្មួញ ចាន់ ម៉េងហាំងនេះ។ បើតាមប្រជាពលរដ្ឋ និងអ្នករកស៊ីនៅក្រុងក្រចេះបាន អះអាងថា ឈ្មួញ ចាន់ ម៉េង ហាំង ជះលុយយ៉ាងច្រើន សម្បើម ទើបអាចឈរជើងក្នុងរបររកស៊ី ខុសច្បាប់នេះបានរឹងមាំយូរអង្វែងជាងគេ នៅខេត្តក្រចេះ៕ ហេង នរិន្ទ្រ
