សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ កម្លាំងនគរបាលស្រុកពារាំង ឃាត់ខ្លួនជនសង្ស័យជាបុរសវ័យចំណាស់ម្នាក់ ដោយសារប្រើហិង្សាដោយចេតនា បង្ករបួសស្នាមដល់អ្នកដទៃ ដោយយកពូថៅចោលទៅលើជនរងគ្រោះត្រូវចំកញ្ចឹងក បណ្ដាលឲ្យរបួសធ្ងន់ មូលហេតុទំនាស់ដីផ្លូវរទេះ។
ហេតុការណ៍នេះបានកើតឡើង កាលពីវេលាម៉ោង៦ និង២០នាទីល្ងាច ថ្ងៃអាទិត្យ ៦កើត ខែ ផល្គុន ឆ្នាំកុរ ព.ស.២៥៦៣ ត្រូវនឹង ថ្ងៃទី ២៩ ខែមីនា ឆ្នាំ២០២០ ស្ថិតនៅត្រង់ចំណុច ភូមិពារាំង ឃុំរាប ស្រុកពារាំង ខេត្តព្រៃវែង ។
មន្ត្រីនគរបាលស្រុកពារាំងបានឲ្យដឹងថា៖ ជនរងគ្រោះឈ្មោះ ផា ភី ភេទប្រុស អាយុ ៤៤ឆ្នាំ រស់នៅភូមិពារាំង ឃុំរាប ស្រុកពារាំង ខេត្តព្រៃវែង ។ ចំណែកឯជនបង្ករឈ្មោះ ស្បោង រឿន ភេទប្រុស អាយុ ៧២ឆ្នាំ រស់នៅភូមិពារាំង ឃុំរាប ស្រុកពារាំង ខេត្តព្រៃវែង ។ នៅពេលម៉ោងកើតហេតុខាងលើជនរងគ្រោះបានធ្វើដំណើរតាមផ្លូវរទេះ ក្បែរផ្ទះជនសង្ស័យ ដែលកន្លងមកជនរងគ្រោះនិងជនសង្ស័យមានទំនាស់យូរមកហើយ។
ដោយឃើញជនរងគ្រោះកំពុងធ្វើដំណើរតាមផ្លូវរទេះបែបនេះ ជនសង្ស័យបានទាញពូថៅដងឈើប្រវែងជាងកន្លះម៉ែត្រ ចោលសំដៅជនរងគ្រោះបណ្តាលឲ្យត្រូវចំកញ្ចឹងក របួសធ្ងន់ ហើយត្រូវក្រុមគ្រួសារដឹកយកទៅកាន់មន្ទីរពេទ្យភ្លាមៗ។
រីឯជនសង្ស័យត្រូវបានកម្លាំងនគរបាលប៉ុស្តិ៍រដ្ឋបាល ឃុំរាប ឃាត់ខ្លួនជាមួយវត្ថុតាងពូថៅមួយដើម ដើម្បីកសាងសំណុំរឿងបញ្ជូនទៅអធិការដ្ឋាននគរបាលស្រុកពារាំងចាត់ការបន្តតាមនីតិវិធីច្បាប់ ៕ សហការី
