សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ហែម ដារិទ្ធ អភិបាល នៃគណៈអភិបាលខណ្ឌពោធិ៍សែនជ័យ មុននេះបន្តិច នារសៀលថ្ងៃទី៦ ខែមេសា ឆ្នាំ២០២០ បានជម្រុញអោយសម្ថតកិច្ចទាំងអស់តាមចាប់ជនបង្ករហេតុចាប់ស្ត្រីរោងចក្រចងដៃនឹងទ្វារ ដើម្បីដោះស្រាយទៅតាមផ្លូវច្បាប់ ដោយលោកមិនទទួលយកបាននូវអំពើបែបនេះមកលើជនរងគ្រោះ។
អភិបាល នៃគណៈអភិបាលខណ្ឌពោធិ៍សែនជ័យ លោក ហែម ដារិទ្ធ បានបញ្ជាក់យ៉ាងដូច្នេះថា៖ ក្នុងនាមខ្ញុំបាទជាប្រធានគណៈបញ្ជាការឯកភាពខណ្ឌពោធិ៍សែនជ័យ នឹងជម្រុញអោយសម្ថតកិច្ចទាំងអស់តាមចាប់ជនបង្ករហេតុម្នាក់នេះ ដើម្បីដោះស្រាយទៅតាមផ្លូវច្បាប់។
សូមបញ្ជាក់ថា៖ អំពើឃោឃៅ អសីលធម៍មួយបង្កឡើងដោយ ម្ចាស់ផ្ទះជួលចាប់ស្ត្រីមានផ្ទៃពោះ៤ខែម្នាក់ ជាកម្មកររោងចក្រ វ័យជាង៣០ឆ្នាំ ចងដៃជាប់នឹងទ្វារ នៅខណ្ឌពោធិ៍សែនជ័យ រហូតដល់មានការបង្ហោះលើ Facebook ព្រោងព្រាត រិៈគន់ពីទង្វើដ៏អមនុស្សធម៍នៃជនបង្ក រំលោភបំពានមកលើស្ត្រីមានភាពទន់ខ្សោយ ក្រីក្រ ខណៈប្រទេសជាតិយើងគ្រប់គ្រងដោយច្បាប់។
គួរជម្រាបថា៖ កាលពីថ្ងៃទី៥ ខែមេសា ឆ្នាំ២០២០ នៅចំណុចក្រោយរោងចក្រឥណ្ឌា ភូមិព្រៃទា សង្កាត់ចោមចៅ៣ ខណ្ឌពោធិ៍សែន មានករណីម្ចាស់ផ្ទះជួល បានចាប់ចងស្ត្រីមានផ្ទៃពោះ៤ខែម្នាក់ជាប់នឹងទ្វារ ដោយសង្ស័យកើតចេញពីជម្លោះបន្តិចបន្តួច ដោយម្ចាស់ផ្ទះបានបោះពាក្យសម្តីថា “ចង់ប្តឹងទៅណាប្តឹងចុះ” ។
បញ្ហានេះ លោកវរសេនីយ៍ទោ ម៉ន វុធី អធិការនគរបាលខណ្ឌពោធិ៍សែន ថ្លែងប្រាប់នៅព្រឹកថ្ងៃទី៦ ខែមេសា ឆ្នាំ២០២០ នេះ យ៉ាងខ្លីថា ពិតជាមានករណីនេះមែន ហើយសមត្ថកិច្ចប៉ុស្តិ៍ចោមចៅ៣ កំពុងសាកសួរជនសង្ស័យ រួចក៏ចុចបិទទូរស័ព្ទតែម្តង ។
មជ្ឈដ្ឋានមួយចំនួន សង្កេតឃើញថា ចាប់តាំងពីលោកវរសេនីយ៍ទោ ម៉ន វុធី ឡើងជាអធិការនគរបាលខណ្ឌពោធិ៍សែន ជំនួសលោក យឹម សារ៉ាន់ មក គឺ បទល្មើសបានកើតឡើងជាបន្តបន្ទាប់ ពិសេសបញ្ហាបទល្មើសចរាចរណ៍ ដែលថ្មីៗនេះ ប៉ូលិសខណ្ឌពោធិ៍សែនជ័យ បានផាកពិន័យបុរសម្នាក់ដែលជិះម៉ូតូបើកភ្លើងពេលថ្ងៃ ចំនួន២៥,០០០រៀល និង ទុកម៉ូតូគេ១យប់ ពិន័យថែម៣៥,០០០រៀលទៀត ដែលនាំអោយមហាជនរិះគន់យ៉ាងខ្លាំងក្លា ។
ទន្ទឹមនេះ មហាជនក៏បានសំណូមពរដល់លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ ពិនិត្យសកម្មភាពការងាររបស់លោកវរសេនីយ៍ទោ ម៉ន វុធី ឡើងជាអធិការនគរបាលខណ្ឌពោធិ៍សែន ផង ៕ដោយ៖ សុខ ខេមរា
