សង្ស័យស្រវឹងស្រាបើករថយន្តបុកម៉ូតូកង់បីពីក្រោយរបួសស្ត្រី០២នាក់

ភ្នំពេញ៖ បុរសម្នាក់រួមដំណើរនឹងបុរសម្នាក់ទៀតបើករថយន្តកូរ៉ូឡាមួយគ្រឿងក្នុងល្បឿនលឿនខ្វះការប្រុងប្រយ័ត្នទៅបុកម៉ូតូកង់បីឥណ្ឌាពីក្រោយពេញទំហឹងបណ្ដាលឲ្យស្ត្រី០២នាក់ជាភ្ញៀវរងរបួស។

ហេតុការណ៍នេះកើតឡើងកាលពីវេលាម៉ោង ១០និង ១០ នាទីយប់ថ្ងៃទី១៤ខែមេសាឆ្នាំ ២០២០ នៅចំណុចមុខភោជនីយដ្ឋានក្តាមស្រែ តាមបណ្ដោយផ្លូវជាតិលេខ ៤ក្នុងសង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសម្នាក់បើកម៉ូតូកង់បីឥណ្ឌាមួយគ្រឿងពណ៌សពាក់ស្លាកលេខភ្នំពេញ1HX-4739ដឹកស្ត្រី០២នាក់ជាភ្ញៀវធ្វើដំណើរទិសដៅពីកើតទៅលិចលុះមកដល់ចំណុចកើតហេតុខាងលើក៏មានរថយន្តមួយគ្រឿងម៉ាកកូរ៉ូឡាពណ៌សពាក់ស្លាកលេខភ្នំពេញ2S-1509បើកបរដោយប្រុសម្នាក់រួមដំណើរនិងបុរសម្នាក់ទៀតធ្វើដំណើរមកពីក្រោយបុកកង់បីពីក្រោយពេញទំហឹងបណ្តាលឲ្យស្ត្រី០២នាក់ជាភ្ញៀវអង្គុយនៅខាងក្រោយរងរបួសត្រូវបានបងប្អូនប្រជាពរដ្ឋនៅកន្លែងកើតហេតុនាំគ្នាបញ្ជូនទៅសង្គ្រោះនៅឯមន្ទីរពេទ្យភ្លាមៗ។ចំណែកម៉ូតូកង់បីនិងរថយន្តរងការខូចខាតយ៉ាងដំណំដូចគ្នា។

ក្រោយកើតហេតុសមត្ថកិច្ចមូលដ្ឋានបានចុះមកដល់បានឲ្យភាគីទាំងសងខាងធ្វើការសម្របសម្រួលគ្នាដោយខាងភាគីរថយន្តបានចេញសំណងថ្លៃព្យាបាលទៅលើជនរងគ្រោះទាំង ពីរនាក់និងខូចខាតម៉ូតូកង់បីចំនួន ៣៣០ ដុល្លារដើម្បីបញ្ចប់រឿងនៅនឹងកន្លែងកើតហេតុ៕សុខាសែនជ័យ​