សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជានិច្ចកាល មិនភ្លេចទេ ចំពោះសុខទុក្ខ ជនរួមជាតិ ថ្ងៃនេះសម្តេចក៏បានថ្លែងថា៖ សុខសប្បាយជាទេបងប្អូនជនរួមជាតិ អរគុណចំពោះការយកចិត្តទុកដាក់ធ្វើតាមការណែនាំរបស់រាជរដ្ឋាភិបាលក៏ដូចជាការណែនាំរបស់ក្រសួងសុខាភិបាល ដើម្បីចូលរួមទប់ស្កាត់ហានិភ័យនៃការឆ្លងរាលដាលជំងឺកូវីដ-១៩ នៅក្នុងប្រទេសយើង។ សូមកូនក្មួយកុំធ្វេីអ្វីដែលខុសច្បាប់នៅក្នុងប្រទេសគេដែលកំពុងដាក់ក្នុងគ្រាអាសន្នអោយសោះ។
ទន្ទឹមនឹងនេះដែរ សម្តេចតេជោ ក៏សូមអំពាវនាវដល់បងប្អូនកូនក្មួយ និងពលករពលការនីដែលកំពុងរស់នៅធ្វើការក្រៅប្រទេស ជាពិសេសនៅប្រទេសថៃ សូមគោរពតាមច្បាប់ និងបទបញ្ញាត្តិទាំងឡាយដែលប្រទេសគេបានដាក់ចេញរួមទាំងច្បាប់បម្រាមគោចរ និងបម្រាមជួបជុំគ្នាជាក្រុម ឬជប់លៀងជាក្រុមដែលពេលនេះប្រទេសគេកំពុងមានការហាមឃាត់តឹងរឹងបំផុតក្នុងការទប់ស្កាត់ការចម្លងរោគកូវីដ-១៩។
សម្តេចបន្តថា៖ សំខាន់ណាស់នៅពេលនេះ គឺសុវត្ថិភាពសុខភាពអាយុជីវិតបងប្អូនកូនក្មួយពលករពលការនីផ្ទាល់។ សូមបងប្អូនយោគយល់និងគោរពច្បាប់ទាំងក្នុងប្រទេស និងក្រៅប្រទេស ជាពិសេសនៅក្នុងស្ថានភាពដែលប្រទេសភាគច្រើនបានដាក់ចេញនូវបទបញ្ញត្តិនិងបម្រាមដ៏តឹងរឹងក្នុងការទប់ស្កាត់ការឆ្លងរាលដាលជំងឺកូវីដ-១៩។
សម្តេចសូមទេវតាឆ្នាំថ្មីនាំមកនូវសិរីសួស្តី និងលាភសំណាងដល់បងប្អូន និងកូនក្មួយទាំងអស់គ្នា ហើយសូមបានចៀសផុតពីជំងឺឆ្លងកូនវីដ-១៩ គ្រប់ៗគ្នា៕ ដោយ៖សុខខេមរា
