សារព័ត៌មាន នគរវត្ត តែងតែនាំមុខគេជានិច្ច
អង់គ្លេស៖ ក្របខ័ណ្ឌបាល់ទាត់លីកកំពូលអង់គ្លេស Premier League បានបើកកិច្ចប្រជុំពិសេសមួយដើម្បីស្វែងរកដំណោះស្រាយលេងការប្រកួតដែលនៅសល់ឲ្យចប់សព្វគ្រប់ត្រឹមថ្ងៃទី៣០ ខែមិថុនាខាងមុខ។ ការអូសបន្លាយនេះគឺដោយសារតែវិបត្តិវីរុសកូរ៉ូណា ហើយការប្រកួតអាចនឹងធ្វើឡើងដោយបិទទ្វារ។
កិច្ចប្រជុំនេះធ្វើឡើងរវាងគណៈកម្មការរៀបចំការប្រកួត និងមន្ត្រីនៃក្លិបនីមួយៗ។ ការពន្យារពេលខុសប្រក្រតីរបស់ Premier League ដោយសារមេរោគកូវីដ-១៩ ឬកូរ៉ូណា បានធ្វើឲ្យប៉ះពាល់យ៉ាងខ្លាំង ដល់កិច្ចសន្យាមួយចំនួន រវាងក្លិប នឹងកីឡាករ មួយទៀតគឺរវាងក្លិបនឹងម្ចាស់ឧបត្ថម្ភលើក្លិបនីមួយៗ ដែលធ្វើឲ្យខាតបង់ថវិកាយ៉ាងច្រើន។
ចំណែកក្លិប Liverpool វិញត្រូវប្ដូរម្ចាស់អាវថ្មីពី New Balance ទៅ Nike នៅខែមិថុនាដូចគ្នា ដែលទាំងនេះសុទ្ធសឹងជាបញ្ហាត្រូវពិភាក្សា។
ដោយឡែកកីឡាករមួយចំនួនដូចជា Willian របស់ Chelsea និង Vertonghen របស់ Tottenham ត្រូវផុតកុងត្រានៅខែមិថុនាតែម្ដង ដែលជាបញ្ហាត្រូវបន្តឲ្យលេងក្នុងក្លិប ឬដើរចេញ៕ដោយ៖ ភារៈ
