ព័ត៌មានទាន់ហេតុការណ៍៖

ក្រសួងសុខាភិបាលបានចំណាយថវិកា៤លានដុល្លាររួចហើយដើម្បីព្យាបាល និងប្រឆាំងវីរុសកូវីដ១៩

ចែករំលែក៖

ភ្នំពេញ​៖ មន្ត្រីជាន់ខ្ពស់​ក្រសួងសុខាភិបាល​កម្ពុជា បានប្រកាសថា ក្រសួង​បាន​ចំណាយ​ថវិកា​ប្រមាណ ៤​លាន​ដុល្លារ​អាមេរិក ទៅលើ​ការព្យាបាល​ក៏ដូចជា​ប្រយុទ្ធប្រឆាំង​និង​ជំងឺ​កូ​វីដ​១៩​។​

​លោកស្រី យក់ សម្បត្តិ រដ្ឋលេខាធិការ​ក្រសួងសុខាភិបាល បាន​ឲ្យ​ដឹងថា ការចំណាយ​របស់​ក្រសួង​ទៅលើ​ប្រតិបត្តិការ​ប្រយុទ្ធប្រឆាំង​វីរុស​កូ​វីដ​-19 ក៏ដូចជា​ព្យាបាល​អ្នកជំងឺ គឺមាន​ប្រមាណ ៤​លាន​ដុល្លារ ខណៈ​បច្ចុប្បន្ននេះ ក្រសួង​មាន​ថវិកា​ប្រមាណ ៧​លាន​ដុល្លារ នៅក្នុង​គណនី​រប​សស់​ធនាគារ ABA ដែល​បាន​ប្រមូល​ពី​សប្បុរជន​នានា តាម​ការអំពាវនាវរ​បស់​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​។​
​បើតាម​លោកស្រីយក់ សម្បត្តិ ក្រសួង​បាន​បម្រុង​ថវិកា​ប្រមាណ ៣០​លាន​ដុល្លារ សម្រាប់ធ្វើ​ប្រតិបត្តិការ​ជំងឺ​កូ​វីដ​១៩​នេះ ខណៈ​ថ្លៃ​សេវា​ព្យាបាល​សម្រាប់​អ្នក​ផ្ទុក​ជំងឺ​កូ​វីដ ១៩ ម្នាក់ ត្រូវ​ចាយ​ថវិកា​អស់​ប្រមាណ​ពី​ជាង ២០០០ ទៅ ២៥០០​ដុល្លារ ដោយ​ថវិកា​ជាង ១​ពាន់​ដុល្លារ សម្រាប់​ចំណាយ​ទៅលើ​ការធ្វើ​តេស្ត​រក​មេរោគ និង​ជាង ១​ពាន់​ដុល្លារ​ទៀត ចំណាយ​ទៅលើ​ថ្លៃ​ថ្នាំ អាហារ​ហូបចុក ថែទាំ និង​ការ​ស្នាក់នៅ​ជាដើម​។​

​លោកស្រី ការធ្វើ​តេស្ត​រក​មេរោគ​កូ​វីដ​១៩ នៅ​វិទ្យាស្ថាន​ប៉ាស្ទ័រ​មួយដង​សម្រាប់​អ្នក​ផ្ទុក​ជំងឺ​ម្នាក់ ត្រូវ​ចំណាយ​ចន្លោះ​ពី ១០០​ដុល្លារ ទៅ ១២០​ដុល្លារ ដែល​អ្នកខ្លះ​ធ្វើតេស្ត​ពី​១០ ទៅ ១១​ដង ក្នុង​រយៈពេល​ស្នាក់នៅ​ពី​៥ ទៅ ៧​ថ្ងៃ​។​

​គួរ​បញ្ជាក់ថា ការទទួល​បន្ទុក​ចំណាយ​ទាំងស្រុង​របស់​រដ្ឋាភិបាល​កម្ពុជា ទៅលើ​ការព្យាបាល​អ្នកជំងឺ Covid-19 គឺជា​ទង្វើ​មនុស្សធម៌​ដ៏​ថ្លៃថ្លា ដែល​បច្ចុប្បន្ននេះ រដ្ឋាភិបាល​បាន​ត្រៀម​ថវិកាបម្រុង​ជាច្រើន​លាន​ដុល្លារ សម្រាប់​ចំណាយ​បន្ថែម​ពីលើ​ការចូលរួម​បរិច្ចាគ​ថវិកា និង​ធនធាន​ផ្ទាល់ខ្លួន​របស់​មន្ត្រីរាជកា​រ និង​បណ្តា​សប្បុរសជន​នានា​នៅ​ទូទាំងប្រទេស​៕ដោយ៖ ហេង សូរិយា


ចែករំលែក៖