សារព័ត៌មាន នគរវត្ត តែងតែនាំមុខគេជានិច្ច
ប្រទេសបារាំង៖ ដើម្បីហាមឃាត់ និងប្រយុទ្ធប្រឆាំងការលក់ម៉ាស់ខុសច្បាប់ទាំងឡាយ ដែលទុកសម្រាប់បុគ្គលិកសុខាភិបាលបារាំង ខណៈពេលជំងឺ COVID-19 កំពុងតែរីកសាយភាយខ្លាំងនៅក្នុងប្រទេស ហើយសម្ភារវេជ្ជសាស្ត្រមួយចំនួន កំពុងតែខ្វះខាត ។
ជាក់ស្តែងនៅថ្ងៃទី២៦ ខែមេសា ឆ្នាំ២០២០ ប៉ូលិសបារាំង បានរឹបអូសម៉ាស់ខុសច្បាប់ចំនួន ១៤ម៉ឺនសន្លឹក ដែលត្រៀមលក់នៅក្នុងទីផ្សារងងឹត ។ នេះគឺជាចំនួនម៉ាសដ៏ច្រើនបំផុត ដែលប៉ូលិសបារាំងរឹបអូសបានចាប់តាំងពីផ្ទុះជំងឺរលាកសួត ដែលបង្កដោយកូរ៉ូណាវីរុស (COVID-19) នាពេលកន្លងមក ។
បើតាមទីភ្នាក់ងារព័ត៌មាន AFP ក្នុងការចុះបង្ក្រាបនេះ មន្ត្រីប៉ូលិសបារាំង បានចាប់ខ្លួនបុរសចំនួន ២នាក់ នាសង្កាត់ Saint-Denis ក្នុងរដ្ឋធានីបារីស ។ តាមការសាកសួររបស់ប៉ូលិស ក្នុងចំណោមពួកគេទាំងពីរ មាន១នាក់ គឺជាអ្នកជំនួញ ដែលបានទិញម៉ាស់ពីហូឡង់ក្នុងតម្លៃប្រមាណជិត ៩ម៉ឺនដុល្លារ។ ក្នុងប្រភេទម៉ាស់ទាំងនោះ ក៏មានម៉ាស់ការពារប្រភេទ FFP2 ផងដែរ។ បើតាមការអះអាងរបស់មន្ត្រីប៉ូលិស ម៉ាស់ដែលមានចំនួនដ៏ច្រើនបែបនេះ គឺត្រៀមរៀបចំលក់ឲ្យកម្មករសំណង់ ក្នុងតម្លៃដ៏ខ្ពស់មួយ ។
នាខែមីនាកន្លងទៅ អាជ្ញាធរបារាំង បានរឹបអូសម៉ាស់ប្រមាណជា ៣២៥០០សន្លឹក ដែលត្រូវបានគេទិញមកពីចិន និងស្តុកទុកនៅក្នុងឃ្លាំងមួយក្បែរទីក្រុងប៉ារីស។ បន្ថែមពីលើនេះ ក្នុងខែដដែល អាជ្ញាធរបារាំងក៏បានរឹបអូសម៉ាស់ប្រមាណជា ២៨៨០០សន្លឹក ក្នុងសង្កាត់មួយ នាទីក្រុងប៉ារីសផងដែរ។
គិតមកត្រឹមថ្ងៃទី២៧ ខែមេសា ឆ្នាំ២០២០នេះ បារាំងមានករណី COVID-19 សរុបចំនួន ១៦២១០០ករណី អ្នកស្លាប់ចំនួន ២២៨៥៦ករណី និងអ្នកជាសះស្បើយមានចំនួន ៤៤៩០៣ករណី៕
ដោយ៖ស តារា
