នគរបាលស្រុកព្រៃនប់បំបែកសំណុំរឿងឃាតកម្មសម្លាប់មនុស្សមួយករណីនិងឃាត់ខ្លួនជនសង្ស័យម្នាក់

ខេត្តព្រះសីហនុ-នគរបាលស្រុកព្រៃនប់បំបែកបានសំណុំរឿងឃាតកម្មសម្លាប់មនុស្សមួយករណីនិងឃាត់ខ្លួនជនសង្ស័យម្នាក់ ដែលជាជនដៃដល់បានហើយនារសៀលថ្ងៃ៣០ ខែមេសា ឆ្នាំ២០២០នេះ ក្នុងនោះរវាងជនសង្ស័យនិងជនរងគ្រោះត្រូវជាមិត្តភក្ដិនិងគ្នា។

លោកវរសេនីយ៍ទោ ហួ យ៉ៃ អធិការនគរបាលស្រុកព្រៃនប់បានប្រាប់អោយដឹងថាក្រោយការចាប់ខ្លួនជនសង្ស័យថា ជនរងគ្រោះ(សាកសព)ឈ្មោះ  ថាត ភារៈភេទប្រុស អាយុ 19 ឆ្នាំ មុខរបរ នៅផ្ទះ មានទីលំនៅភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ តាមការពិនិត្យសាកសព ឃើញមានស្នាមរបួសត្រង់ក្បាល និងផ្ទៃមុខ ហើយសាកសពត្រូវបានរកឃើញកាលពីរសៀលថ្ងៃទី 29មេសា2020 នៅចំណុច ក្នុងព្រៃជើងភ្នំថ្មដាស្ថិតក្នុង​សំរុងក្រោម ឃុំសំរុង ស្រុកព្រៃនប់ ខេត្ត​ព្រះសីហនុ​ ។ តាមការបញ្ជាក់ពីម្តាយជនរងគ្រោះអោយដឹងថា កូនរបស់គាត់បានចេញបាត់ពីផ្ទះតាំងពីថ្ងៃទី២៧ខែមេសាឆ្នាំ២០២០ វេលាម៉ោងប្រហែល៩យប់ ដោយជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ សេរីឆ្នាំ២០១៩ ស្លាក លេខ ព្រះសីហនុ 1H -9772 និងសម្ភារៈជាប់ខ្លួនរួមមាន៖

-ទូរសព្ទ័ដៃម៉ាកអាយហ្វូន១គ្រឿង

-ចិញ្ចៀនផ្លាទីន ១វង់

-នាឡិកាដៃ ១។

  ជនសង្ស័យឈ្មោះ ចាន់ លីឈាង  អាយុ១៨ឆ្នាំ ភេទប្រុសមុខរបរ កម្មករជ្រៀកឈើ មានទីលំនៅភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ ត្រូវបានសមត្ថកិច្ចនាំយកទៅធ្វើត្រាប់តាម ពីសកម្មភាពដែលខ្លួនបានប្រព្រឹត្ត ហើយនៅចំពោះមុខសមត្ថកិច្ចជនសង្ស័យរូបនេះបានសារភាពថា ខ្លួនពិតជាបានសម្លាប់ ជនរងគ្រោះត្រូវជាមិត្តភក្ដិមែន ក្រោយរូបគេទូរសព្ទ័ហៅជនរងគ្រោះ មកសេពគ្រឿងញៀនជាមួយគ្នា ក្នុងនោះខ្លួនបានយកដំថ្មវ៉ៃទៅលើក្បាលជនរងគ្រោះបណ្តាលអោយស្លាប់នៅនឹងកន្លែងកើតហេតុ ដើម្បីប្លន់យកម៉ូតូនិងសម្ភារៈជាប់ខ្លួន។

ក្រោយធ្វើសកម្មភាពរួចខ្លួនក៏ជិះម៉ូតូជនរង​គ្រោះចូលទៅក្រុងព្រះសី​ហនុ ដើម្បីលក់ប៉ុន្តែគ្មានអ្នកហ៊ានទិញ ព្រោះម៉ូតូគ្មានប័ណ្ណសម្គាល់(កាតគ្រី) ទើបជិះម៉ូតូត្រឡប់មកផ្ទះវិញ និងក្រោយមកត្រូវបាននគរបាលឃាត់ខ្លួន។

ជនសង្សយ័នគរបាលកំពុងសាកសួរតាមនិតិវិធី ៕ឆ្លាម សមុទ្រ