សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ស្រីស្អាតម្នាក់ដែលគណនីហ្វេសប៊ុករបស់នាងមានឈ្មោះថា Varin Rathana ជាអ្នកលក់ផលិតផល កែសម្ផស្សតាម អនឡាញបានផ្ទុះកំហឹងយ៉ាងខ្លាំង ក្នុងថ្ងៃដំបូងនៃការរឹតបន្តឹងច្បាប់ចរាចរណ៍ដោយបានបង្ហោះនៅក្នុងទំព័រហ្វេសប៊ុករបស់ខ្លួនបង្ហាញនូវក្រដាសផាកពិន័យរបស់នគរបាលចរាចរណ៍ចំនួនទឹកប្រាក់ ៦ ម៉ឺនរៀល ព្រោះតែនាងអត់ពាក់មួកសុវត្ថិភាព។នាងបានបញ្ចេញនូវកំហឹងប្រើពាក្យមិនសមរម្យ(ពាក្យអសុរោះ)និងជេរប្រមាថដាក់ទំនាយសមត្ថកិច្ចយ៉ាងធ្ងន់ៗទៀតផង។
ទង្វើនេះធ្វើឲ្យមនុស្សជាច្រើនពុំគាំទ្រចំពោះការប្រើប្រាស់ពាក្យសម្តីមិនសមរម្យ ជេរប្រទេចធ្ងន់ៗទៅលើសមត្ថកិច្ចនោះឡើយ។ មហាជនជាច្រើនបានរិះគន់នាងថា ស្អាតតែកាយ តែចរិតអន់!ដោយគេសរសេរដាក់ទៅវិញថា «តិចទៀតដឹងខ្លួនហើយ, គេបានប្រកាសឲ្យដឹងហើយតើ ដល់ពេលគេផាកខឹងគេ គេឲ្យពាក់មួកការពារជីវិតខ្លួនឯងសោះ ហេតុអីមិនពាក់?» ។
ដោយឡែកអ្នកខ្លះទៀតព្រោះតែហួសចិត្តនឹងការបញ្ចេញកំហឹង របស់ស្ត្រីខាងលើនេះពេក ក៏បានសរសេរតបដាក់ឲ្យយ៉ាងដូច្នេះថា៖ «នាងអើយ ខ្លួនឯងជិះម៉ូតូមិនពាក់មួកសុវត្ថិភាព ពេលនគរបាលចរាចរ ចាប់ផាកពិន័យយ បែរជាមកជេរមន្ត្រីអនុវត្តន៍ច្បាប់ទៅវិញ ។ ចុះបើនាងពាក់មួកទៅ មានមន្ត្រីណាទៅផាកនាង ? ប្រឹងដាក់ទំនាយគេ គិតថានាងល្អមែន?» តិចទៀតនាងដឹងខ្លួនហើយ។
សូមបញ្ជាក់ថាអ្នកណាក៏ដឹងដែរថាចំនួនទឹកប្រាក់ផាកពិន័យយ៉ាងចាស់ៗដៃ នៃការរឹតបន្តឹងច្បាប់ចរាចរណ៍ផ្លូវគោក ដែលចាប់អនុវត្តពីថ្ងៃទី១ ខែឧសភា ឆ្នាំ២០២០ នេះ គឺផ្តោតទៅលើតែចំពោះអ្នកបើកបរយានយន្តទាំងឡាយណាប្រព្រឹត្តល្មើសច្បាប់ប៉ុណ្ណោះ។
ក្នុងនោះ អ្នកបើកបរមិនពាក់មួកសុវត្ថិភាព ត្រូវផាកពិន័យចំនួន ៦០.០០០ ៛, មិនគោរពភ្លើង និងស្លាកសញ្ញាចរាចរណ៍ ១០០.០០០ ៛, ល្មើលក្នុងការបត់ ការវ៉ាជែង ១០០.០០០ ៛ , ការដឹកលើសចំណុះ ១០០.០០០ ៛, ស្រវឹង ២៥០.០០០ ទៅ ១.០០០.០០០៛ (តាមកម្រិតជាតិអាល់កុល), គ្មានស្លាកលេខ ១២០.០០០ ៛, ទូរស័ព្ទពេលបើកបរ ៨០.០០០៛ (ប្រើបាន តែប្រើខ្សែភ្ជាប់សំឡេង) ។
ជាលទ្ធផល គេសង្កេតឃើញថា អ្នកបើកបរល្មើសច្បាប់ ត្រូវបានសមត្ថកិច្ចចាប់ផាកពិន័យមិនចេះតិចដែរក្នុងថ្ងៃដំបូងនៃការត្រួតពិនិត្យចរាចរណ៍នេះ៕ដោយ÷ប្រាថ្នា
