សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅក្នុងពិធីសាសនា នៃពិធីបុណ្យតម្កល់សព អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី មាតាក្មេកសម្តេចអគ្គមហាសេនាបតីតេជោ ហ៊ុន សែន មាតាបង្កើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពល ខេមរភូមិន្ទ និងជាមេបញ្ចាការកងទ័ពជើងគោក ត្រូវបានជ្រើសរើសបួសមុខភ្លើង តំណាងឲ្យក្រុមគ្រួ សារ នៃសពអ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា។
ពិធីសាសនាកោរសក់បួសមុខភ្លើង ដែលប្រារព្វធ្វើឡើងនៅមុខ ព្រះវិហាវត្តបុទុមវតីរាជធានីភ្នំពេញ ការបំបួសមុខភ្លើងជូនភិក្ខុ ហ៊ុន ម៉ាណែត ត្រូវបានធ្វើឡើងក្រោមវត្តមានសម្តេចព្រះពុទ្ធជ័យ មុនី ឃឹម សន មេគុណរាជធានីភ្នំពេញ ព្រមទាំងវត្តមានលោក ពេជ សោភណ្ឌ និងលោកស្រី ជាមាតាបិតាក្មេក និងលោកស្រី ពេជ ចន្ទមុន្នី ជាភរិយារបស់លោក ហ៊ុន ម៉ាណែត។
សម្តេចព្រះពុទ្ធជ័យមុនី ឃឹម សន ជាគ្រូឧបធ្យា បានប្រោសព្រំ ពុទ្ទិពរជ័យបវរមហាប្រសើរ ជូនភិក្ខុ ហ៊ុន ម៉ាណែត ក្នុងពិធីបួសមុខភ្លើងនេះ សូមបាន ជួបតែសុខសុភមង្គលសិរីវិបុលវឌ្ឍនា ចូលកើតមានដល់គ្រប់ក្រុមគ្រួសារទាំងអស់ ពិសេសឧទ្ទទិស ជូនដល់វិញ្ញាណក្ខន្ធ អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា បានយោងយិតទៅចាប់បដិ សន្ធិនៅឋានបរមសុខកុំបីឃ្លាងឃ្លាត ដោយប្រការណាមួយ ចាប់តាំងពីថ្ងៃនេះជាដរាបតរៀងទៅ។
សូមបញ្ជាក់ថា៖ ពិធីបញ្ចុះសពនឹងប្រព្រឹត្តទៅនៅថ្ងៃពុធ១៥កើត ខែពិសាខ ឆ្នាំជូត ទោស័ក ព.ស២៥៦៣ ត្រូវនឹងថ្ងៃ០៦ ខែឧសភា ឆ្នាំ២០២០ វេលាម៉ោង ១៥និង៣៣នាទី រសៀលនៅភូមិទី២ ឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ៕ដោយ៖សុខ ខេមរា
