សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៣នាក់បានធ្វើសកម្មភាពឆក់យកទូរស័ព្ទដៃពីជនរងគ្រោះបានសម្រេចហើយតែរត់មិនរួចត្រូវសមត្ថកិច្ចស្រាវជ្រាវតាមចាប់បាន ។
ករណីនេះបានកើតឡើងកាលពីវេលាម៉ោង១៨ និង ៥២នាទីថ្ងៃទី០៦ ខែឧសភា ឆ្នាំ២០២០ នៅចំណុចមុខឃ្លាំងលក់គ្រឿងសង្ហារឹមយីហោ សុខហេង ផ្លូវបេតុង ក្នុងភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ។
នគរបាលប៉ុស្តិ៍ទឹកថ្លា បានឱ្យដឹងថា ជនសង្ស័យទាំង៣នាក់នោះទី១-ឈ្មោះ រិទ្ធី ប៉ ភេទប្រុស អាយុ១៥ឆ្នាំ ជនជាតិខ្មែរ មុខរបរគ្មាន ស្នាក់នៅផ្ទះសង់ថ្មី ផ្លូវបេតុង សង្កាត់ស្ទឹងមានជ័យ ខណ្ឌមានជ័យ (គ្មានសារធាតុញៀន) ។ទី២-ឈ្មោះ កែវ សុផានិត ភេទប្រុស អាយុ១៥ឆ្នាំ ជនជាតិខ្មែរ មុខរបរគ្មាន ស្នាក់នៅផ្ទះសង់ថ្មី ផ្លូវបេតុង សង្កាត់បឹងសាឡាង ខណ្ឌទួលគោក (គ្មានសារធាតុញៀន) និងទី ៣-ឈ្មោះ ឡាយ សុភ័ត្ត្រា ភេទប្រុស អាយុ២០ឆ្នាំ ជនជាតិខ្មែរ មុខរបរគ្មាន ស្នាក់នៅផ្ទះលេខ១៧E ផ្លូវលេខ២៧១ ភូមិត្រពាំងឈូក សង្កាត់អូរបែកក្អម ខណ្ឌសែនសុខ (គ្មានសារធាតុញៀន) ។
ចំណែកជនរងគ្រោះឈ្មោះ ហ៊ន សេរីរ័ត្ន ភេទស្រី អាយុ២៦ឆ្នាំ ជនជាតិខ្មែរ មុខរបរបុគ្គលិកក្រុមហ៊ុនឯកជន ស្នាក់នៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ ។
ប្រភពពីសមត្ថកិច្ចដដែលបានឱ្យដឹងថានៅមុនពេលកើតហេតុជនរងគ្រោះកំពុងឈរកាន់ទូរស័ព្ទនិយាយនៅមុខក្រុមហ៊ុនស្រាប់តែលេចមុខក្រុមជនសង្ស័យជិះម៉ូតូ២គ្រឿង ម៉ាកនិច ពណ៌សលាយលឿង ផលិតឆ្នាំ២០២០ ពាក់ស្លាកលេខភ្នំពេញ 1HY-5510និងមួយគ្រឿងទៀត ម៉ាកនិច ពណ៌សលាយលឿង ផលិតឆ្នាំ២០២០ ពាក់ស្លាកលេខភ្នំពេញ 1IF-4660 មកដល់ក៏ធ្វើសកម្មភាពឆក់យកទូរសព្ទ័ដៃ ម៉ាកអាយហ្វូន បានសម្រេចហើយក៏ជិះរត់។ក្រោយមកជនរងគ្រោះបានមកដាក់ពាក្យបណ្តឹងឱ្យសមត្ថកិច្ចជួយធ្វើអន្តរាគមន៍រហូតស្រាវជ្រាវឃាត់ខ្លួនបានពួកគេទាំង៣នាក់តែម្តង។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិីតិវិធី៕ដោយ៖ ចន្ទ លីហ្សា
