សារព័ត៌មាន នគរវត្ត តែងតែនាំមុខគេជានិច្ច
អុីរ៉ង់៖ មកទល់ពេលនេះ អុីរ៉ង់ បានប្រកាសថា មានទាហាន១៩នាក់ស្លាប់ និង ១៥នាក់រងរបួស នៅក្នុងសមយុទ្ធបាញ់គ្រាប់ពិត របស់កម្លាំងទាហានជើងទឹកអុីរ៉ង់ ។
សារព័ត៌មានអុីរ៉ង់ FARS បានផ្សាយថា ក្រុមជួយសង្គ្រោះបានទៅដល់កន្លែងកើតហេតុ ហើយក៏បានជួយដល់ទាហានរងរបួសបញ្ជូនមកកាន់កំពង់ផែ ដើម្បីព្យាបាល។ មន្ត្រីជំនាញអុីរ៉ង់នឹងបើកការស្រាវជ្រាវករណីខាងលើ ។
កន្លងមកមានប្រភពព័ត៌មានបានផ្សាយថា នាវាចម្បាំង Jamaran របស់កម្លាំងទាហានបដិវត្តន៍អ៊ិស្លាមអុីរ៉ង់ IRGC បានបាញ់មីស៊ីលចំនាវា សណ្តោង Konarak របស់ទាហានជើងទឹកដែលចាកចេញពីគោលដៅមិនទាន់ពេលវេលា ក្រោយពេលបានអូសនាវាចាស់ទៅកាន់ទីកន្លែងសម្រាប់គោលដៅមីស៊ីលបាញ់ប្រហារ ។
បណ្តាញទូរទស្សន៍ជាតិអុីរ៉ង់ បានផ្សាយថា ទាំងនោះជាគ្រោះថ្នាក់ ដោយសារតែនាវាសណ្តោងនៅជិតគោលដៅដែលត្រូវវាយប្រហារខ្លាំងពេក ទើបមានហេតុការណ៍អាក្រក់កើតឡើង៕
ដោយ៖ធី រីណា
