សារព័ត៌មាន នគរវត្ត តែងតែនាំមុខគេជានិច្ច
បុគ្គលិក គិលានុបដ្ឋាកគិលានុបដ្ឋាយិកាព្យាបាលអ្នកជំងឺកូវីដ-១៩នៅទីក្រុងញូវយ៉កសហរដ្ឋអាមេរិក បាននាំគ្នាដង្ហែក្បួនបាតុកម្មប្រឆាំងការរើសអើងជាតិសាសន៍ ក្រោយការស្លាប់របស់បុរសស្បែកខ្មៅGeorge Floyd។ ភាគច្រើនបុគ្គលិក គ្រូពេទ្យនិងគិលានុបដ្ឋាកគិលានុបដ្ឋាយិកា ជាជនជាតិស្បែកខ្មៅចូលរួមធ្វើបាតុកម្ម “Black Lives Matter”។
ក្រុមគ្រូពេទ្យបានពាក់ម៉ាស់ការពារ ដង្ហែក្បួនចេញពីមន្ទីរពេទ្យBellevue ក្នុងតំបន់ Manhattan ទីក្រុងញូវយ៉កដើម្បីប្រឆាំងការរើសអើងជាតិសាសន៍។
ក្រុមគ្រូពេទ្យបានលើកស្លាកបដាដែលមានអក្សរធំៗថា «ការថែទាំសុខាភិបាលគឺមើលថែទាំងអស់គ្នា ហើយការរើសអើងជាតិសាសន៍បានសម្លាប់អ្នកជំងឺរបស់យើង»។ ក្រុមគ្រូពេទ្យក៏បានលុតជង្គង់រយៈពេល ៨នាទីនិង៤៦វិនាទី ជាការរំលឹកដល់ពេលវេលាដែលប៉ូលិសសង្កត់កបុរសស្បែកខ្មៅរហូតដល់ស្លាប់ បើទោះបីគាត់ស្រែកថាខ្ញុំមិនអាចដកដង្ហើមបានក្តី។
សារព័ត៌មាន AFP នៅថ្ងៃទី ៥ខែមិថុនា បានដកស្រង់សម្តីគ្រូពេទ្យ Kamini Doobay ផ្នែកសង្គ្រោះបន្ទាន់បានលើកឡើងថា«យើងបានអានពាក្យសម្បថថាបម្រើពលរដ្ឋទាំងអស់ ក្នុងការថែទាំសុខភាពដោយមិនមានការើសអើងឡើយ»។ ការធ្វើបាតុកម្មខាងលើដោយមានការចូលរួមពីក្រុមគ្រូពេទ្យមកពីមន្ទីរពេទ្យធំៗចំនួន៦ នៅទីក្រុងញូវយ៉ក៕ដោយ៖ធី រីណា
