សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ជនសង្ស័យម្នាក់ពេលកំពុងធ្វើសកម្មភាពលួចម៉ូតូសណ្ដោងរ៉ឺម៉ករបស់ពលរដ្ឋលក់បន្លែនៅក្រុងតាខ្មៅ ត្រូវបានម្ចាស់រ៉ឺម៉កឃើញទាន់ស្រែកឆោឡោប្តឹងសមត្ថកិច្ចឲ្យចាប់ខ្លួន។ ករណីនេះបានកើតឡើង កាលពីថ្ងៃទី៧ ខែមិថុនា ឆ្នាំ២០២០ វេលាម៉ោង១០និង១៥នាទីត្រង់ចំណុចផ្សារតាខ្មៅថ្មី ស្ថិតក្នុងភូមិដើមមៀន១ សង្កាត់ដើមមៀន ក្រុងតាខ្មៅ ខេត្តកណ្ដាល។
មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យដែលសមត្ថកិច្ចចាប់ខ្លួនឈ្មោះ គៀក បិន ភេទប្រុស អាយុ៣៩ឆ្នាំ ជនជាតិវៀតណាម មុខរបរ មិនពិតប្រាកដ បច្ចុប្បន្នស្នាក់នៅភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។ ចំណែកជនរងគ្រោះឈ្មោះ លន់ ពៅ ភេទប្រុស អាយុ៣១ឆ្នាំ មានទីលំនៅភូមិកណ្តាលសង្កាត់រលួស ខណ្ឌដង្កោភ្នំពេញ មុខរបរ លក់ដូរ។ ដោយឡែកវត្ថុតាងដកហូតបានមាន ម៉ូតូ១គ្រឿងម៉ាកហុងដាពណ៌ខ្មៅ ស៊េរីឆ្នាំ២០០៩ ពាក់ស្លាកលេខ កណ្តាល១J-១២៩៣ និង រ៉ឺម៉កពណ៌ខៀវ ចំនួនមួយ (របស់ជនរងគ្រោះ)។
ប្រភពដដែលបន្តថា នៅថ្ងៃខែឆ្នាំកេីតហេតុខាងលេី ជនរងគ្រោះនិងប្រពន្ធបានបើករ៉ឺម៉កម៉ូតូដឹកបន្លែមកលក់នៅផ្សារតាខ្មៅថ្មីដូចសព្វដង ហើយបានចតម៉ូតូសណ្តោងរ៉ឺម៉កទុកចោល ពេលនោះជនសង្ស័យក៏បានធ្វើសកម្មភាពលួចយករួចបើករត់គេចមកដល់ខាងត្បូងប៉ុស្តិ៍ព្រែកឫស្សី តែត្រូវជនរងគ្រោះតាមទាន់ទាន់ ហើយបានរាយការណ៍មកសមត្ថកិច្ចប៉ុស្តិ៍នគរបាលព្រែកឫស្សីសហការជាមួយផ្នែកជំនាញនគរបាលយុត្តិធម៌ចុះទៅដល់កន្លែងកើតហេតុរួចបាននាំជនសង្ស័យនិងវត្តុតាងមកកាន់អធិការដ្ឋាននគរបាលក្រុងតាខ្មៅដើម្បីបន្តចាត់ការតាមនីតិវិធី៕
ដោយ៖ស្អាងជ័យ
