សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ បុរសម្នាក់បានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍ត្រូវរថយន្តបុកស្លាប់ខណៈដែលបុរសរងគ្រោះកំពុងជិះម៉ូតូកាលពីវេលាម៉ោង៣និង៤៤នាទីទៀបភ្លឺឈានចូល ថ្ងៃទី១៥ ខែមិថុនា ឆ្នាំ២០២០ នៅលើកំណាត់ផ្លូវជាតិលេខ៥៦A ត្រង់ចំណុចមុខខ្លោងទ្វារវត្តពោធិ៍តាបែន ស្ថិតក្នុងភូមិគោករកា ឃុំតាបែន ស្រុកស្វាយចេក ។
នគរបាលមូលដ្ឋានបានឲ្យដឹងថាជនរងគ្រោះឈ្មោះ អឿន ឡាយហាំងភេទប្រុស អាយុ២២ឆ្នាំ រស់នៅភូមិអូរវែងត្បូង ឃុំតាបែន ស្រុកស្វាយចេក បើកបរម៉ូតូម៉ាកអៀរ៉ក ពណ៌ខ្មៅ គ្មានស្លាកលេខ ។ចំណែករថយន្តបង្កហេតុបានបើករត់គេចខ្លួនបាត់ ។
ប្រភពដដែលបញ្ជាក់ថា នៅមុនពេលកើតហេតុ ជនរងគ្រោះបានជិះម៉ូតូទៅទិញអីវ៉ាន់ឲ្យម្តាយលក់។ លុះពេលជិះចេញពីភូមិឡើងមកផ្លូវជាតិដោយបើកពីជើងទៅត្បូងមកដល់ចំណុចកើតហេតុ ទល់មុខខ្លោងទ្វារវត្តពោធិ៍តាបែន ក៏ត្រូវរថយន្តធុនធំដែលបើកបញ្ច្រាសទិសគ្នាពីត្បូងទៅជើងបុកបណ្តាលឲ្យជនរងគ្រោះស្លាប់ភ្លាមៗនៅនឹងកន្លែងតែម្ដង។
ចំណែកម៉ូតូជនរងគ្រោះខូចខាតធ្ងន់ធ្ងរ រីឯអ្នកបើកបររថយន្តក្រោយពីកើតហេតុ បានបើករត់គេចខ្លួនបាត់ស្រមោល។
សពជនរងគ្រោះត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី បន្ទាប់នគរបាលជំនាញធ្វើការវាស់វែងនិងត្រួតពិនិត្យរួចមក។ចំពោះម៉ូតូសមត្ថកិច្ចជំនាញយកទៅរក្សាទុកនៅប៉ុស្តិ៍រដ្ឋបាលឃុំតាបែនរង់ចាំប្រគល់ជូនក្រុមគ្រួសារជនរងគ្រោះវិញ ៕ ដោយ៖វណ្ណា
