សារព័ត៌មាន នគរវត្ត តែងតែនាំមុខគេជានិច្ច
សៀមរាប៖ តារាសម្តែង និងបង្ហាញម៉ូត កញ្ញា ទឹម រដ្ឋា បានធ្វើឲ្យគេភ្ញាក់ផ្អើលខ្លាំងក្រោយពីនាងបានបង្ហាញឈុតសម្លៀកបំពាក់ប្រណីតមួយនៅលើទឹកដីនៃខេត្តសៀមរាប។ នាងត្រូវបានអ្នករួមអាជីពជជីកសួរដោយឆ្ងល់ថាជាការថតរូបមុនមង្គលការ (Pre-wedding)ជាមួយគូស្នេហ៍ឬយ៉ាងណា?
ថ្មីៗនេះ កញ្ញា ទឹម រដ្ឋា បានស្កាត់ពីភ្នំពេញទៅទឹកដីអង្គរអច្ឆរិយៈ ដើម្បីថតរូប Pre-wedding ដែលលេចចេញសង្ស័យថានាងអាចនឹងចូលរោងការឆាប់ជាមួយគូស្នេហ៍ដែលតែងបង្ហាញភាពផ្អែមល្ហែមខ្លាំងលើបណ្តាញសង្គមផ្ទាល់ខ្លួន។ ក្នុងរូបថតនោះ កញ្ញា ទឹម រដ្ឋា គ្រងឈុតដ៏អស្ចារ្យមួយឈ្មោះថា “កេងកងកម្ពុជា” ជាការច្នៃឡើងរបស់សំអាងការ ប្រសិទ្ធសិរី យកលំនាំតាមសត្វកេងកង ដែលជាប្រភេទសត្វកម្រក្នុងប្រទេសកម្ពុជា ជាសត្វគំរូមេបាស្មោះស្ម័គ្រនឹងគ្នា។ នាងទទួលបានការកោតសរសើរខ្លាំងថាពិតជាស្រស់ស្អាត ខណៈអ្នកគាំទ្រស្នើឲ្យបង្ហាញមុខគូស្នេហ៍ថតរួមគ្នាព្រោះតែពួកគេចង់បានដំណឹងល្អពីនាងឆាប់ៗ ទោះជាយ៉ាងដំណឹងនៃការរៀបការត្រូវបានបញ្ចប់ព្រោះតែបុរសក្នុងរូបថតនោះមិនមែនជាគូស្នេហ៍នាងនោះឡើយ ហើយគេនៅមិនទាន់ដឹងដែរថាតើបុរសនោះជាអ្នកណា ខណៈតារាស្រីរូបនេះនៅមិនទាន់ចេញមុខបញ្ជាក់។
គួររំលឹកថា កាលពីពេលកន្លងទៅ ទឹម រដ្ឋា ធ្លាប់ប្រាប់ឲ្យអ្នកសារព័ត៌មានក្នុងស្រុកដឹងថា នាងជាមួយគូស្នេហ៍បរទេសរបស់នាងស្រលាញ់គ្នាណាស់ ហើយគូស្នេហ៍នាងជាមនុស្សចិត្តទូលាយ ស្រលាញ់ យកចិត្តទុកដាក់ជាមួយនាង តែ ទឹម រដ្ឋា ក៏ធ្លាប់ទម្លាយឲ្យដឹងថា នាងជាមួយគូស្នេហ៍នៅមិនទាន់មានគម្រោងរៀបការនៅឡើយទេ ពោលគឺចង់នៅមើលចិត្តគ្នាឲ្យយូរជាងនេះបន្តិច ជៀសវាសកុំឲ្យរៀបការខុស ហើយស្តាយក្រោយនៅពេលក្រោយ រហូតដល់ពេលនេះក៏មានការបែកធ្លាយរូបភាពបែបនេះឡើងមក ធ្វើឲ្យមានការភ្ញាក់ផ្អើលដល់មហាជន អ្នកគាំទ្រនាងជាខ្លាំង៕ ដោយ ៖វឌ្ឍនា
