សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់ក្រោយពីធ្វេីសកម្មភាពលួចយកម៉ូតូគេ១គ្រឿងបានសម្រេចហើយគេចខ្លួនបានមួយថ្ងៃ ត្រូវបានកម្លាំងនគបាលប៉ុស្ដិ៍រដ្ឋបាលចាក់អង្រែលេីសហការជាមួយកម្លាំងអធិការដ្ឋាននគរបាលខណ្ឌមានជ័យធ្វើការស្រាវជ្រាវរហូតដល់ឃាត់ខ្លួនបាននៅវេលាម៉ោង៩៖០០នាទីថ្ងៃទី៣ ខែកក្កដា ឆ្នាំ២០២០ ត្រង់ចំណុចផ្ទះគ្មានលេខ ផ្លូវលំ ភូមិតាងៅ សង្កាត់និរោធ ខណ្ឌច្បារអំពៅ ។
លោកនាយប៉ុស្ដិ៍រដ្ឋបាលចាក់អង្រែលេី អ៊ុំ រតនា បានឲ្យដឹងថា ជនសង្ស័យខាងលេីមានឈ្មោះ អុិន ចន្ថា ហៅ ខ្មៅ ភេទប្រុស អាយុ ២៥ឆ្នាំ ជនជាតិខ្មែរ ស្នាក់នៅផ្ទះគ្មានលេខ ផ្លូវលំ ភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ មុខរបរមិនពិតប្រាកដ(គ្មានផ្ទុកសារធាតុញៀនទេ) ។ ចំណែកជនរងគ្រោះឈ្មោះ ខេង វិចិត្ត ភេទប្រុស អាយុ ៣០ឆ្នាំ ជនជាតិខ្មែរ ស្នាក់នៅផ្ទះជួលគ្មានលេខ ផ្លូវលំ ភូមិព្រែកតានូសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរបុគ្គលិកសណ្ឋាគារណាហ្គាវើលដ៍។ រីឯវត្ថុតាងចាប់យកមានម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AF-1604 (ជារបស់ជនរងគ្រោះ) និងដែកបន្ទះមានចុងស្រួចចំនួន១, ដែកដងវ៉ែនតាចំនួន១, កូនសោម៉ូតូ១ (ជារបស់ជនសង្ស័យ) ។
លោក អ៊ុំ រតនា នាយប៉ុស្ដិ៍នគរបាលចាក់អង្រែលេីបានឲ្យដឹងទៀតថា កាលពីថ្ងៃទី២ ខែកក្កដា ឆ្នាំ ២០២០ វេលាម៉ោង១៧៖០០នាទី ជនរងគ្រោះឈ្មោះខេង វិចិត្ត ភេទប្រុស អាយុ៣០ឆ្នាំ បានយកម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AF- 1604 មកចាក់សោចតទុកនៅមុខផ្ទះជួល ផ្លូវលំ ភូមិព្រែកតានូ សង្កាត់ ចាក់អង្រែលើ ខណ្ឌមានជ័យ រាជធានីភ្នំពេញ (ចំណុចកើតហេតុ) ហើយចូលទៅសម្រាកក្នុងផ្ទះរហូតដល់វេលាម៉ោង២១៖០០នាទីថ្ងៃដដែល ជនរងគ្រោះឈ្មោះ ខេង វិចិត្ត បានចេញពីក្នុងផ្ទះមកមើលម៉ូតូស្រាប់តែបាត់មិនឃើញ ។
លុះមកដល់ថ្ងៃទី៣ ខែកក្កដា ឆ្នាំ២០២០ វេលាម៉ោង៧៖២០នាទីព្រឹកទើបជនរងគ្រោះឈ្មោះ ខេង វិចិត្ត មកដាក់ពាក្យបណ្តឹងនៅស្នាក់ការនគរបាលប៉ុស្តិ៍ចាក់អង្រែលើឲ្យជួយស្រាវជ្រាវ ខណៈនោះកម្លាំងនគរបាលប៉ុស្តិ៍ចាក់អង្រែលើបានចុះទៅពិនិត្យនៅកន្លែងកើតហេតុធ្វើការស្រាវជ្រាវរហូតដល់វេលាម៉ោង៩៖០០នាទីថ្ងៃទី៣ ខែកក្កដា ឆ្នាំ ២០២០ ក៏បានឃាត់ខ្លួនជនសង្ស័យម្នាក់ឈ្មោះ អុិន ចន្ថា ហៅ ខ្មៅ ភេទប្រុស អាយុ ២៥ឆ្នាំ នៅចំណុចផ្ទះគ្មានលេខ ផ្លូវលំ ភូមិតាងៅ សង្កាត់ និរោធ ខណ្ឌ ច្បារអំពៅ និងចាប់យកវត្ថុតាងមានម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ1AF 1604 (ជារបស់ជនរងគ្រោះដែលបាត់) យកមកសាកសួរនៅស្នាក់ការនគរបាលប៉ុស្តិ៍ចាក់អង្រែលើដើម្បីចាត់ការតាមនីតិវិធីតែម្តង។
បច្ចុប្បន្នជនសង្ស័យឈ្មោ អុិន ចន្ថា ហៅ ខ្មៅ ត្រូវបានឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី៕ ដោយ៖ ភារ៉ា ដង្កោ
