សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ នៅថ្ងៃទី៨ខែកក្កដា ឆ្នាំ២០២០ បានធ្វើលិខិតផ្ញើជូនទៅគ្រប់អភិបាលខេត្តទាំងអស់ ឲ្យណែនាំបន្តទៅរដ្ឋបាលក្រុង ស្រុក ខណ្ឌ ឃុំ សង្កាត់ ដើម្បីបញ្ជាក់ឬចុះហត្ថលេខាលើលិខិតស្នាមនានា ពាក់ព័ន្ធនឹងដីធ្លី ឲ្យបានត្រឹមត្រូវតាមច្បាប់ បែបបទ និង នីតិវិធី។ មិនតែប៉ុណ្ណោះសម្តេច ស ខេង ណែនាំទៅអភិបាលខេត្ត ឲ្យចុះជួបប្រជាពលរដ្ឋផ្ទាល់ នៅកន្លែងណា ដែលមានទំនាស់ដីធ្លី ដើម្បីស្រាវជ្រាវឲ្យបានច្បាស់លាស់ពីសាវតារនៃទំនាស់ដីធ្លីនោះ និងការតវ៉ារបស់ប្រជាពលរដ្ឋ ។
សម្តេច ស ខេង សង្កត់ធ្ងន់ថា អភិបាលខេត្ត ត្រូវចាត់វិធានការឲ្យបានម៉ឺងម៉ាត់ លើមន្ត្រីដែលបញ្ជាក់ឬចុះហត្ថលេខាលើលិខិតស្នាមមិនស្របច្បាប់ពាក់ព័ន្ធនឹងដីធ្លី។ ហើយការចុះជួបប្រជាពលរដ្ឋនិងការចុះស្រាវជ្រាវដោយផ្ទាល់ គឺដើម្បីធ្វើជាមូលដ្ឋាន ក្នុងការដោះស្រាយទំនាស់ដីធ្លីជូនពួកគាត់។
សម្តេច ស ខេង បន្តថាអភិបាលខេត្តទាំងអស់ ត្រូវយកចិត្តទុកដាក់ចំពោះស្ថិតិប្រជាពរដ្ឋ និងដីធ្លីរបស់ពួកគាត់ ដែលកាន់កាប់និងអាស្រ័យផលជាក់ស្តែងយូរឆ្នាំមកហើយ នៅក្នុងតំបន់ការពារធម្មជាតិ និងតំបន់គម្របព្រៃដើម្បីកាត់ឆ្វៀលដីនិងផ្តល់កម្មសិទ្ធិជូនពួកគាត់ ព្រមទាំងរៀបចំដី១០ភាគរយទៀត សម្រាប់ការប្រើប្រាស់រួមរបស់សហគមន៍។
សូមជម្រាបថា យោងតាមមាត្រា៣០នៃច្បាប់ភូមិបាល ចែងថា បុគ្គលទាំងឡាយ ដែលបានអាស្រ័យផល នៃភោគៈដោយសន្តិវិធី និង មិនមានការជំទាស់ចាប់ពី៥ឆ្នាំយ៉ាងតិច មានសិទ្ធិស្នើសុំប័ណ្ណកម្មសិទ្ធិ។ ភោគៈ គឺសំដៅលើទ្រព្យសម្បតិ្តជាដីធ្លី ដែលបុគ្គលណាម្នាក់ កំពុងកាន់កាប់ស្របច្បាប់និងមានការទទួលស្គាល់ពីអាជ្ញាធរមូលដ្ឋាន តែមិនទាន់មានប្លង់រឹង ពីក្រសួងដែនដី។
សម្តេចរដ្ឋមន្ត្រី នៅក្រើនរម្លឹកទៀតថា អភិបាលខេត្ត ត្រូវបង្កើនការតាមដាននិងការគ្រប់គ្រងសភាពការណ៍ ពាក់ព័ន្ធនឹងការកាន់កាប់ដីធ្លីរបស់ប្រជាពលរដ្ឋ នៅតាមតំបន់ការពារធម្មជាតិនិងតំបន់គម្របព្រៃ ដើម្បីទប់ស្កាត់កុំឲ្យមានការរុកទន្ទ្រានកាន់កាប់ដីព្រៃឬដីរដ្ឋដោយខុសច្បាប់បន្តទៀត។សម្តេច សង្កត់ធ្ងន់ជាមួយអភិបាលខេត្តយ៉ាងដូច្នេះថា៖«រាល់ការរុករានទន្ទ្រានកាន់កាប់ថ្មី លើដៃព្រៃឬដីរដ្ឋដោយខុសច្បាប់ ត្រូវហាមដាច់ខាតហើយត្រូវប្រើវិធានការរដ្ឋបាលនិងវិធានការច្បាប់ឲ្យតឹងរឹងនិងម៉ឺងម៉ាត់ ដើម្បីទប់ស្កាត់»។
ជាមួយគ្នានេះ អភិបាលខេត្ត ត្រូវអប់រំនិងណែនាំប្រជាពលរដ្ឋ ដើម្បីកុំជឿតាមការញុះញង់របស់មេខ្យល់ឬជនខិលខូច ដែលឆ្លៀតឱកាសកេងយកផលប្រយោជន៍ពីបញ្ហាដីធ្លី។ នេះជាប្រសាសន៍របស់សម្តេចរដ្ឋមន្ត្រីដដែលហើយសម្តេច ដាក់បញ្ជាថា៖«ករណីនេះ ត្រូវមានវិធានការបង្ក្រាបមេខ្យល់និងជនខិលខូចទាំងនោះ ស្របតាមច្បាប់ជាធរមាន»។ សម្តេចក្រឡាហោមចេញបញ្ជានេះ គឺជាការបន្ថែមទៅនឹងបញ្ជារបស់សម្តេចនាយករដ្ឋមន្ត្រី ហ៊ុនសែន។ ក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី៣ ខែកក្កដា ឆ្នាំ២០២០សម្តេចនាយករដ្ឋមន្ត្រី ប្រកាសថាដំណាក់កាលនេះ គឺត្រូវវះកាត់រាល់ជនខិលខូច ដែលគប់គិតគ្នា យកដីរដ្ឋនិងដីរបស់ប្រជាពលរដ្ឋ។
ដោយឡែកប្រមុខរដ្ឋាភិបាលកម្ពុជា ក៏ធ្លាប់បានបញ្ជាក់ដែរថា បើរកឃើញជនខិលខូចទាំងនោះ គឺត្រូវផ្តន្ទាទោស និងឈានដល់ការដកហូតមុខតំណែង ហើយថែមទាំងបណ្តេញចេញពីគណបក្សប្រជាជនកម្ពុជាតែម្តង។
គួរបញ្ជាក់ផងដែរថា ទំនាស់ដីធ្លីរវាងប្រជាពលរដ្ឋនិងអ្នកមានអំណាចឬពួកឧកញ៉ា-ឯកឧត្តម គឺជាបញ្ហារ៉ាំរ៉ៃនិងស្មុគស្មាញមួយ នៅកម្ពុជា។មកដល់បច្ចុប្បន្ន នៅតែមានប្រជាពលរដ្ឋ បន្តទាមទារនិងសុំកិច្ចអន្តរាគមន៍ពីរដ្ឋាភិបាល លើការរំលោភបំពានដីធ្លីនិងផ្ទះសម្បែងរបស់ពួកគាត់ពីសំណាក់អ្នកមានលុយ-មានអំណាច។ ខណៈដែលរដ្ឋាភិបាល ក៏ប្រឹងប្រែងដោះស្រាយដែរ តែនៅតែមិនអស់៕ ដោយ៖ស តារា
