សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ណាហ្គាវើលដ៍បេះដូងសប្បុរស ដែលជាផ្នែកទំនួលខុសត្រូវការងារសង្គមរបស់ក្រុមហ៊ុនណាហ្គាវើលដ៍ នៅថ្ងៃទី១៥ ខែកក្កដាឆ្នាំ២០២០ បានធ្វើការឧបត្ថម្ភបរិក្ខារបន្ថែមទៀតជាលើកទី២ ដល់ក្រសួងសុខាភិបាលដើម្បីប្រឆាំងនឹងរោគរាតត្បាតកូវីដ–១៩ ក្នុងប្រទេសកម្ពុជា។ បរិក្ខារទាំងនោះរួមមាន ម៉ាស៊ីនធ្វើតេស្តរកមេរោគកូវីដ–១៩ ចំនួន ១ គ្រឿង និងឧបករណ៍ធ្វើតេស្តរកមេរោគកូវីដ–១៩ ចំនួន ៦.៤០០ឈុត។ ការឧបត្ថម្ភលើកនេះគឺជាលើកទី២ បន្ថែមទៅលើការឧបត្ថម្ភលើកទី១ ដែលមានកុំព្យូទ័រយួរដៃ ៥គ្រឿង និងជែលលាងដៃ ៥០០ ដបដែលសរុបទាំងពីរលើកនេះ មានទឹកប្រាក់សរុបប្រមាណ ៤៧.៤០០ ដុល្លារអាមេរិក។
លោក Pern Chen នាយកគ្រប់គ្រងណាហ្គាវើលដ៍ បាននិយាយថា“ម៉ាស៊ីនធ្វើតេស្តរកមេរោគកូវីដ–១៩ នេះ គឺជាម៉ាស៊ីនបច្ចេកវិទ្យាទំនើបមួយដែលអាចឲ្យក្រសួងសុខាភិបាលប្រើប្រាស់ដើម្បីចម្រាញ់ និងពង្រីកសំណាកDNA តូចៗដើម្បីងាយធ្វើតេស្តរកមេរោគកូវីដ–១៩ឲ្យបានលឿន។ជាមួយនឹងគ្រឿងបរិក្ខារធ្វើតេស្តទាំងនេះ វានឹងជួយឲ្យគ្រូពេទ្យជួរមុខរបស់យើងអាចធ្វើតេស្តរកមេរោគបានយ៉ាងឆាប់រហ័ស។ យើងសូមវាយតម្លៃខ្ពស់ចំពោះប្តេជ្ញាចិត្តរបស់ពួកគេដែលបាន និងកំពុងខិតខំរក្សាប្រជាជន និងប្រទេសកម្ពុជាឲ្យមានសុវត្ថិភាព”។
ក្នុងពេលមកទទួលបរិក្ខារដោយផ្ទាល់ពីលោក Pern Chen លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានឲ្យដឹងថា“ក្នុងកំឡុងពេលនៃការឧបត្ថម្ភលើកទី១ ដែលមានឧបករណ៍បង្ការមេរោគកូវីដ–១៩ និងកុំព្យូទ័រយួរដៃរបស់ណាហ្គាវើលដ៍បេះដូងសប្បុរស យើងមានសេចក្តីសោមនស្សរីករាយយ៉ាងខ្លាំងដោយបានឮថា ណាហ្គាវើលដ៍សន្យាផ្តល់ម៉ាស៊ីនធ្វើតេស្តរកមេរោគកូវីដ–១៩ ថ្មី ១ គ្រឿង និងឧបករណ៍ធ្វើតេស្តរកមេរោគរាប់ពាន់ឈុតមកដល់ក្រសួង។
ការធ្វើតេស្តរកមេរោគកូវីដ–១៩ នៅតែជាការងារដ៏មានសារសំខាន់បំផុតរបស់យើងក្នុងការទប់ស្កាត់រោគរាតត្បាត ហើយម៉ាស៊ីនទំនើបថ្មី និងឧបករណ៍ធ្វើតេស្តទាំងនេះ នឹងជួយដល់ការងារប្រចាំថ្ងៃរបស់យើងបន្ថែមទៀត។ តាងនាមឲ្យប្រជាជនកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តសប្បុរសនេះ” ៕ដោយ៖ស តារា
