សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់ត្រូវបានក្រុមគ្រួសារប្រទះឃើញចងកនឹងដើមស្វាយខាងកើតផ្ទះបង្កការភ្ញាក់ផ្អើលទាំងយប់ដល់អ្នកភូមិនិងសមត្ថកិច្ចជំនាញចុះមកពិនិត្យសព។
ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី២០ ខែកក្កដា ឆ្នាំ២០២០នៅចំណុចភូមិព្រៃតាយឹង ឃុំប្រសូត្រ ស្រុកស្វាយទាប ខេត្តស្វាយរៀង។
បើតាមសមត្ថកិច្ចនគរបាលស្រុកបានឱ្យដឹងថា បុរសខាងលើមានឈ្មោះផង់ សេត អាយុ៤៦ឆ្នាំ មុខរបរកសិករ មានទីលំនៅក្នុងភូមិឃុំកើតហេតុ។
ក្រោយកើតហេតុភ្លាមសមត្ថកិច្ចនគរបាលជំនាញដោយមានការចូលរួមពីលោកវេជ្ជបណ្ឌិត សន សុខុម គ្រូពេទ្យមន្ទីរពេទ្យបង្អែកស្រុកស្វាយទាបបានធ្វើការពិនិត្យសាកសពប្រមាណជាមួយម៉ោងទើបសន្និដ្ឋានថាបុរសរូបនេះពិតជាចងកសម្លាប់ខ្លួនឯងប្រាកដមែន ដោយបានយកក្រមាចងកសម្លាប់ខ្លួនទៅនឹងដើមស្វាយខាងកើតផ្ទះខណៈមិនមានស្លាកស្នាមអ្វីសម្គាល់ថាជាអំពើឃាតកម្មអ្វីនោះទេ។
បើតាមអ្នកភូមិបានឱ្យដឹងថា បុរសខាងលើគឺផឹកស្រាជាប្រចាំមិនសូវលស់ថ្ងៃឡើយ ហើយណាមួយមិនសូវជាក្លែមជាមួយសាច់ឬម្ហូបអ្វីនោះទេ។នៅមុនយប់កើតហេតុគាត់បានផឹកស្រាទាំងព្រឹកនិងបានដើរទ្រេតទ្រោតពេញផ្លូវ លុះយប់ឡើងស្រាប់តែមានការភ្ញាក់ផ្អើលថាគាត់ចងកក្រោមដើមស្វាយខាងកើតផ្ទះចម្ងាយ៦០ម៉ែត្រស្លាប់បាត់ទៅហើយ។
ក្រោយពិនិត្យរួចសមត្ថកិច្ចបានប្រគល់សពឱ្យក្រុមគ្រួសារយកមកធ្វើបុណ្យតាមប្រពៃណី៕ ដោយ៖យឹម សុថាន
