សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រុមហ៊ុនSK Bioscience ដែលជាក្រុមហ៊ុនរបស់កូរ៉េខាងត្បូងទទួលបានការគាំទ្រពីមូលនិធិ Bill Gates អាចផលិតវ៉ាក់សាំងប្រឆាំងកូវីដ-១៩ដល់ទៅ២០០លានដូស នៅក្នុងខែមិថុនា ឆ្នាំ២០២១ខាងមុខ។
លោក Bill Gates បានសហការយ៉ាងស្អិតរមួតជាមួយក្រុមហ៊ុនកូរ៉េខាងត្បូង។ តាមព័ត៌មានពីការិយាល័យប្រធានាធិបតីកូរ៉េខាងត្បូង មហាសេដ្ឋី Bill Gates និង ប្រធានាធិបតីមូន ជេអុីន បានជួបពិភាក្សាគ្នាតាមទូរស័ព្ទកាលពីខែមេសា ឆ្នាំ២០២០ ស្តីពីកិច្ចសហប្រតិបត្តិការផលិតវ៉ាក់សាំងប្រឆាំងកូវីដ-១៩ ។
បច្ចុប្បន្នបណ្តាប្រទេសអភិវឌ្ឍន៍កំពុងតែប្រកួតប្រជែងក្នុងការផលិតវ៉ាក់សាំងប្រឆាំងកូវីដ-១៩ ។ លោកBill Gates បានប្រកាសថា លោកបានវិនិយោគទៅលើបណ្តារោងចក្រជុំវិញពិភពលោកក្នុងការផលិតវ៉ាក់សាំងប្រឆាំងកូវីដ-១៩ ក្នុងនោះមានទាំងក្រុមហ៊ុនអាមេរិកផងដែរ។
លោក Bill Gates គឺជាបុគ្គលដែលធ្វើសកម្មភាពមនុស្សធម៌ដ៏ល្បីល្បាញនៅលើពិភពលោក ។ លោកBill Gatesនិងភរិយា Melinda Gates បានចំណាយប្រាក់រហូតដល់៣៦ពាន់លានដុល្លារ ទៅលើមូលនិធិ Bill and Melinda Gates ក្នុងគោលដៅបង្កើនការថែទាំសុខភាពនៅលើពិភពលោក។ មូលនិធិរបស់មហាសេដ្ឋីទទួលបានការគាំទ្រខ្លាំងដោយមានអ្នកបរិច្ចាគជាច្រើនក្នុងមូលនិធិនេះផងដែរ។
ជាមួយគ្នានេះដែរ លោក Bill Gatesបានអំពាវនាវដល់ក្រុមអ្នកផ្តល់ជំនួយបន្តសកម្មភាពបរិច្ចាគប្រាក់របស់ខ្លួនដើម្បីការស្រាវជ្រាវនិងផលិតវ៉ាក់សាំងប្រឆាំងកូវីដ-១៩៕ធី រីណា
