សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អុជធូបសែនកុងម៉ាហើយទុកចោលបណ្ដាលឱ្យឆាបឆេះរានកុងម៉ានៅក្នុងផ្ទះបង្កការភ្ញាក់ផ្អើលដល់សមត្ថកិច្ចយករថយន្តពន្លត់អគ្គិភ័យមកជួយធ្វើអន្តរាគមន៍ជាច្រើនគ្រឿង។
ហេតុការណ៍នេះ បង្កការភ្ញាក់ផ្អើល កាលពីវេលាម៉ោង២រសៀលថ្ងៃទី ២៨ ខែកក្កដា ឆ្នាំ២០២០ ស្ថិតនៅតាមបណ្ដោយផ្លូវលេខ១០១ ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុម្ចាស់ផ្ទះបានអុជធូបសែនកុងម៉ាហើយក៏បានទុកចោល លុះបានប៉ុន្មាននាទីក្រោយមកស្រាប់តែឃើញផ្សែងហុយចេញពីក្នុងផ្ទះក៏នាំគ្នាទៅមើលឃើញអគ្គិភ័យឆាបឆេះរានកុងម៉ាបង្កការភ្ញាក់ផ្អើលដល់ប្រជាពលរដ្ឋនិងកម្លាំងសមត្ថកិច្ចយករថយន្តពន្លត់អគ្គិភ័យជាច្រើនគ្រឿងមកជួយធ្វើអន្តរាគមន៍បាញ់ពន្លត់ទាន់ពេលវេលា មិនបណ្ដាលឱ្យឆាបឆេះរាលដាលដល់ផ្ទះបងប្អូនប្រជាពលរដ្ឋនៅក្បែរខាងឡើយ និងមិនមានអ្នកណាម្នាក់របួសក្នុងករណីនេះទេ គ្រាន់តែខូចខាតរានកុងម៉ានៅក្នុងផ្ទះតែប៉ុណ្ណោះ។
ក្នុងប្រតិបត្តិការនេះកម្លាំងសមត្ថកិច្ចបានយករថយន្តពន្លត់អគ្គិភ័យចំនួន៩គ្រឿងមកដល់កន្លែងកើតហេតុ ប៉ុន្តែប្រើប្រាស់អស់តែបីគ្រឿងអគ្គិភ័យក៏រលត់ទៅវិញនៅវេលាម៉ោង២និង៣០នាទីរសៀលថ្ងៃខែឆ្នាំដដែល៕ ដោយ រ៉ារ៉ា
