សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារីមានផ្ទៃពោះ៣ខែម្នាក់បានសម្រេចចិត្តធ្វើអត្តឃាតដោយចងក គ្រាន់តែឈ្លោះប្រកែកគ្នាជាមួយប្ដីបន្តិចបន្តួចប៉ុណ្ណោះ។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៩និង៣០នាទីយប់ ថ្ងៃទី៣១ ខែកក្កដា ឆ្នាំ២០២០ នៅក្នុងបន្ទប់ជួលជាន់ទី២ ក្នុងភូមិត្រពាំងថ្លឹងទី២ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា នារីដែលធ្វើអត្តឃាតមានឈ្មោះ ស្រី ល័ក្ខ អាយុ២៦ឆ្នាំ ជនជាតិខ្មែរ មុខរបរធ្វើការរោងចក្រ មានស្រុកកំណើតនៅខេត្តព្រៃវែង។
ប្រភពព័ត៌មានពីប្អូនស្រីម្នាក់បានឲ្យដឹងថា មុនពេលកើតហេតុ នារីរងគ្រោះបានឡាយវីដេអូស្រែកក្រោយពីឈ្លោះគ្នាជាមួយប្ដី ហើយក៏សម្រេចចិត្តចងកសម្លាប់ខ្លួន។ ពេលនោះរូបគាត់ក៏ស្ទុះទៅមើលឃើញស្ត្រីរងគ្រោះចងកជាមួយខ្សែអង្រឹងភ្ជាប់ទៅនឹងឥដ្ឋខ្យល់លើបង្អួចត្រដរខ្យល់ទៅហើយ ។ រូបគាត់ក៏រត់មកប្រាប់គេឯងឲ្យមកជួយតែអកុសលនារីរងគ្រោះបានស្លាប់បាត់ទៅហើយ។
ប្រភពដដែលបានបន្តទៀតថា នារីរូបនេះ មុននឹងសម្លាប់ខ្លួន គេបានឮសំឡេងឈ្លោះគ្នាជាមួយប្តី តែមិនដឹងឈ្លោះគ្នាពីរឿងអីនោះទេ។ ក្រោយមកប្តីនោះបានចេញទៅបាត់ធ្វើឲ្យស្ត្រីរងគ្រោះសម្រេចចិត្តបញ្ចប់ជីវិតដោយចងកសម្លាប់ខ្លួនតែម្តង។
បន្ទាប់ពីកើតហេតុ សមត្ថកិច្ចខាងកោសល្យវិច័យ បានចុះមកពិនិត្យមើល សាកសពហើយបានសន្និដ្ឋានថា នារីរងគ្រោះពិតជាស្លាប់ដោយសារចងកធ្វើអត្តឃាតប្រាកដមែន។
សមត្ថកិច្ចធ្វើកំណត់ហេតុឲ្យរថយន្តដឹកសពយកទៅតម្កល់ទុកនៅវត្តទឹកថ្លារង់ចាំ សាច់ញាតិមកទទួលយកទៅធ្វើបុណ្យតាមប្រពៃណី៕ជ្រោយពេជ្រ
