សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ កម្លាំងទាហានអាមេរិកបានបង្ហាញឃ្លីបវីដេអូស្តីពីការសាកល្បងកាំជ្រួចមីស៊ីលដែលមានល្បឿនលឿនជាងសំឡេងដល់ទៅ១៧ដង។ មីស៊ីលល្បឿនលឿនជាប្រភេទ C-HGB បានសាកល្បងតាំងពីខែមីនាឆ្នាំ២០២០ នៅកោះហាវ៉ៃ។
ប៉ុន្តែពិភពលោក ពិសេសប្រទេសដែលមានបច្ចេកវិទ្យាអាវុធទំនើបៗ ដូចជារុស្ស៊ី មិនជឿថាអាមេរិកមានមីស៊ីលលឿនជាងសំឡេង១៧ដងនោះទេ។ ទាំងនោះហើយបានជាអាមេរិកសម្រេចបង្ហាញភស្តុតាងតាមរយៈឃ្លីបវីដេអូ សាកល្បងមីស៊ីលនេះ។
តាមឃ្លីបវីដេអូដែលបានបង្ហាញក្នុងវេទិកាស្តីពីយុទ្ធសាស្ត្រការពារជាតិនៅទីតាំង (SMD) នាថ្ងៃទី៥ខែសីហា មីស៊ីលC-HGBបានវាយប្រហារចំគោលដៅដែលបានកំណត់ទុក។
ក្នុងពេលបង្ហាញឃ្លីបវីដេអូនៅក្នុងពិធី ឧត្តមសេនីយ៍Neil Thurgood មេបញ្ជាការកងទ័ពជើងគោកអាមេរិកបានបញ្ជាក់ថា មីស៊ីលC-HGB មានល្បឿនលឿនជាងសំឡេង១៧ដង ប៉ុន្តែលោកមិនបានបង្ហាញថា មីស៊ីលនោះអាចបំពាក់ក្បាលគ្រាប់ ឬមានរំសេវផ្ទុះប៉ុន្មាននោះឡើយ។
ប៉ុន្មានឆ្នាំចុងក្រោយនេះ អាមេរិក បានបង្កើនការផលិតអាវុធល្បឿនលឿន ក្រោយពេលរុស្ស៊ីប្រកាសពីជោគជ័យក្នុងកម្មវិធីផលិតអាវុធល្បឿនលឿនជាងសំឡេង។ កាលពីខែឧសភាកន្លងមក ប្រធានាធិបតីដូណាល់ ត្រាំ បានលើកឡើងថា អាមេរិកមានមីស៊ីលល្បឿនលឿនជាងគេបង្អស់នៅលើពិភពលោក គឺមានល្បឿនលឿនជាងសំឡេងដល់ទៅ១៧ដង៕ដោយ៖ធី រីណា
