សារព័ត៌មាន នគរវត្ត តែងតែនាំមុខគេជានិច្ច
ជប៉ុន៖ នាវេលាម៉ោង៨និង១៥នាទីព្រឹក ថ្ងៃទី៦ ខែសីហា ដែលជាពេលវេលាអាមេរិកទម្លាក់គ្រាប់បែកបរមាណូដំបូងគេទៅលើទីក្រុងហ៊ីរ៉ូស៊ីម៉ាប្រទេសជប៉ុន។ នៅព្រឹកថ្ងៃទី៦ខែសីហានេះជប៉ុនបានរៀបចំពិធីគោរពវិញ្ញាណក្ខន្ធ ៧៥ឆ្នាំ ដល់ពលរដ្ឋប្រមាណ១៤០.០០០នាក់ ដែលបានស្លាប់ដោយសារគ្រាប់បែកបរមាណូរបស់អាមេរិក ។
តាមគម្រោង អ្នកដែលនៅរស់ក្រោយទម្លាក់គ្រាប់បែកបរមាណូ និងសាច់ញាតិ រួមទាំងមន្ត្រីរដ្ឋាភិបាលបានចូលរួមពិធីគោរពវិញ្ញាណក្ខន្ធ ហើយអំពាវនាវដល់ពិភពលោកទាំងមូលឱ្យមានសន្តិភាព។ ពិធីនេះបានកាត់បន្ថយចំនួនអ្នកចូលរួមដោយសារតែការឆ្លងរាលដាលកូវីដ-១៩ ប៉ុន្តែបានផ្សាយផ្ទាល់លើបណ្តាញទូរទស្សន៍។
សារព័ត៌មានAFPបានដកស្រង់សម្តីអភិបាលក្រុង ហុីរ៉ូស៊ីម៉ា លោក Kazumi Matsui ដែលបានបញ្ជាក់ថា ពិធីគោរពវិញ្ញាណក្ខន្ធជារៀងរាល់ឆ្នាំ គឺដើម្បីអំពាវនាវឲ្យពិភពលោកមានសន្តិភាពបញ្ចប់សង្គ្រាម។
អ្នកចូលរួមបានគោរពវិញ្ញាណក្ខន្ធ នៅវេលាម៉ោង៨ និង១៥នាទីជាពេលដែលគ្រាប់បែកបរមាណូដំបូង ឈ្មោះ “Little boy” ទម្លាក់ទៅលើទីក្រុងហ៊ីរ៉ូស៊ីម៉ា។ អភិបាលក្រុង បានបញ្ជាក់ផងដែរថា ក្រុងនេះមានការរីកចម្រើនឡើងវិញដោយសារតែស្មារតីសាមគ្គីភាពរបស់ពលរដ្ឋ។
សារព័ត៌មាន Japan Times បានផ្សាយថា នៅក្នុងសុន្ទរកថារបស់នាយករដ្ឋមន្ត្រី ស៊ីនហ្សូ អាបេ គឺប្រទេសនិីមួយៗចាំបាច់ត្រូវតែលុបចោលទស្សនៈខ្វះភាពជឿជាក់ ហើយត្រូវតែមានទំនុកចិត្តគ្នាតាមរយៈកិច្ចពិភាក្សា៕ដោយ៖ធី រីណា
