សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារសារព័ត៌មាន World of Buzz បានចេញផ្សាយថ្មីៗនេះថា មានករណីយុវជនម៉ាឡេស៊ីវ័យ ១៤ ឆ្នាំម្នាក់ បានចាញ់បោកមិត្តស្រីដែលស្គាល់គ្នាតាមរយៈការលេងហ្គេម PUBG អស់ប្រាក់ប្រមាណជា ៣០០ ០០០ រីងហ្គីត (៧១,៤៩០ ដុល្លារអមេរិក)។ដូច្នេះយុវវ័យគ្រប់រូបដែលចូលចិត្តលេងហ្គេម PUBG មួយនេះ សូមប្រុងប្រយ័ត្នក្នុងការចាញ់បោកគេដូចករណីមួយនេះ ។
ទីភ្នាក់ងារព័ត៍មានដដែលបន្តថា ហ្គេមPUBG នេះ បានក្លាយជាហ្គេមលេងតាមទូរស័ព្ទដៃដ៏មានប្រជាប្រិយភាពមួយសម្រាប់យុវវ័យក្នុងរយៈពេលប៉ុន្មានឆ្នាំចុងក្រោយនេះ។ ហើយហ្គេម PUBG អាចអនុញ្ញាតឲ្យលោកអ្នកលេងជាក្រុមជាមួយមិត្តភក្តិនិងបង្កើតមិត្តថ្មីៗ បានតាមរយៈការលេងហ្គេមនេះរួមគ្នាតាមបណ្តាញអ៉ីនធឺណេត ។ មិនតែប៉ុណ្ណោះមានអ្នកខ្លះបានស្គាល់គ្នាតាមរយៈការលេងហ្គេម PUBG រហូតបានរៀបការកជាប្តីប្រពន្ធនឹងគ្នាហើយក៏មានដែរអ្នកចាញ់បោកទំនាក់ទំនងក្លែងក្លាយតាមរយៈហ្គេមមួយនេះ។
ប្រភពដដែលបន្តទៀតថា យុវជនវ័យ ១៤ ឆ្នាំរូបនេះជាកូនអ្នកជំនួញមានជីវភាពធូរធាម្នាក់ ហើយរូបគេមានទម្លាប់លេងហ្គេម PUBG ជាប្រចាំរហូតថ្ងៃមួយរូបគេបានជួបនារីម្នាក់តាមបណ្តាញសង្គម និងផ្ដើមបង្កើតទំនាក់ទំនងជាមួយគ្នាតាមរយៈការលេងហ្គេម PUBG ជាមួយគ្នារាល់ថ្ងៃ។ ដោយការរាប់អានគ្នាបាន ២ទៅ៣ ខែ យុវជនដែលទើបនឹងពេញវ័យហាក់មានចិត្តស្រលាញ់មិត្ត PUBG របស់គេ ហើយស្រ្តីរូបនោះក៏ផ្តើមខ្ចីលុយពីយុវជនជាបន្តបន្ទាប់ដោយសន្យាថានឹងសងវិញគ្រប់ចំនួន។
បន្ទាប់មក ដោយមានចិត្តស្រលាញ់ខាងស្រី យុវជនបានលួចដកលុយពីគណនីធនាគាររបស់ឪពុកគេជាបន្តបន្ទាប់ដើម្បីផ្ញើឲ្យនាង សរុបចំនួន ២១ដង និងបើគិតជាប្រាក់សរុបមានចំនួន ២៩៥ ៩៥០ រីងហ្គីត (៧០ ៥១៥ដុល្លារអាមេរិក)។ ប៉ុន្តែកាលពីពេលថ្មីៗនេះ ឪពុករបស់យុវជនដែលកំពុងតែស្លុងអារម្មណ៍នឹងស្នេហាក្លែងក្លាយរូបនេះ បានដឹងរឿងរ៉ាវរបស់គេ តែវាយឺតពេលបន្តិចទៅហើយព្រោះស្រី្តដែលទទួលបានលុយជាង ៧ ម៉ឺនដុល្លាររួចហើយនោះស្រាប់តែទាក់ទងលែងបាន ហើយក៏មិនដឹងទៅរកនាងនៅទីណាដែរ។
បច្ចុប្បន្នភាគីរងគ្រោះបានដាក់ពាក្យបណ្ដឹងទៅកាន់ប៉ូលិសដើម្បីស្វែងរកអន្តរាគមន៍ ខណៈគេជឿថាលុយដែលបាត់ទៅហើយនោះមិនងាយនឹងរកឃើញវិញទេ៕ដោយ៖ស តារា
