សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ ក្មេងៗតូចប្រុសស្រី៣នាក់មកលេងទឹកជាមួយពូ មានគ្នាសរុប ៥នាក់បានលង់ទឹកស្លាប់ពីរនាក់ និងម្នាក់ទៀតជួយសង្គ្រោះផុតពីសេចក្តីស្លាប់នៅចំណុចមុខវត្តជ្រោយថ្ម ស្ថិតក្នុងភូមិជ្រោយថ្ម សង្កាត់បឹងកុក ក្រុងកំពង់ចាម ។
យោងតាមប្រភពព័ត៌មានអោយដឹងថា នៅថ្ងៃទី១២ ខែសីហាឆ្នាំ២០២០វេលាម៉ោង១១និង៥០នាទី កំលាំងប៉ុស្តិ៍នគរបាលរដ្ឋបាលបឹងកុកបានទទួលព័ត៌មានពីប្រជាពលរដ្ឋថា មានករណីមនុស្សលង់ទឹក នៅចំណុចខាងលេី ។ ភ្លាមនោះលោកវរសេនីយ៍ឯក អ៉ឹង ប៊ុន អធិការនគរបាលក្រុងកំពង់ចាម ចាត់អោយកម្លាំងសមត្ថកិច្ចប៉ុស្តិ៍នគរបាលរដ្ឋបាលបឹងកុក សហការជាមួយកម្លាំងអធិការដ្ឋាននគរបាលក្រុង-កម្លាំងអន្តរាគមន៍ស្នងការដ្ឋាននគរបាលខេត្ត-កម្លាំងចរាចរណ៍ផ្លូវទឹក ចុះទៅដល់កន្លែងកើតហេតុដោយពិនិត្យឃើញថាពិតមានករណីមនុស្សលង់ទឹកចំនួន៣នាក់ មានឈ្មោះដូចខាងក្រោម ៖
១-ឈ្មោះ សុខ សេដា ភេទប្រុស អាយុ ៣៥ឆ្នាំ មានសតិមិនគ្រប់ លិចបាត់រកអត់ឃើញ(ពូ)។
២-ឈ្មោះ ធូ វីយូហ្យា ភេទស្រី អាយុ១០ឆ្នាំ (លិចបាត់រកមិនទាន់ឃើញ)។
៣-ឈ្មោះ សុខ ខុត្តម ភេទប្រុស អាយុ ១១ឆ្នាំ ស្រង់បានហើយកម្លាំងសមត្ថកិច្ចនាំទៅសង្រ្គោះបន្ទាន់ភ្លាមៗនៅមន្ទីរពេទ្យទាន់ពេលវេលា។
យោងតាមប្រភពព័ត៌មានពីសមត្ថកិច្ចប្រាប់ដំណេីររឿងអោយដឹងថា នៅថ្ងៃទី១២វេលាម៉ោង១១៖១០នាទីឈ្មោះ សុខ សេដា ត្រូវជាពូនាំជិះម៉ូតូម៉ាក Honda ចេញពីផ្ទះមកលេងទឹកមុខវត្តជ្រោយថ្ម មានគ្នា៥នាក់មាន ១ .ឈ្មោះសុខ សេដា ២ . ឈ្មោះ សុខ ឧត្ដម ៣.ឈ្មោះ ធូ វីយូហ្យា ៤. ឈ្មោះ សុខ លាភ និង ៥.ឈ្មោះ សុខ ដែន ។
ប្រភពបន្តថា នៅពេលមកដល់មុខវត្តក៏ទុកម៉ូតូនៅក្រោមដើមពោធិ៍មាត់ទន្លេរួចក៏នាំគ្នាចុះទៅលេងទឹក ។ ពេលលេងបានបន្តិចឈ្មោះ សុខ ដែន និង សុខ លាភ បានឡើងពីលេងទឹកមកចាំម៉ូតូមុន ចំណែក ៣នាក់ទៀតក៏នៅលេងបន្ត ពេលនោះឈ្មោះ សុខ ឧត្ដម បានឃើញ ឈ្មោះ ធូ វីយូហ្យា លង់ទឹក ពូ ឈ្មោះ សុខ សេដា បាន ហែលទៅជួយ ក៏លិចបាត់ទាំង២ ពេលនោះ សុខ ឧត្ដម បានស្រែកអោយគេជួយរួចក៏លិចបាត់ដែរ បន្ទាប់មកទៀតក៏មានទូកនៅក្បែរនោះអ៊ុំរក ចុះឡើងឃើញឈ្មោះ សុខ ឧត្ដម អណ្ដែតខ្លួនឡើងវិញ ម្ចាស់ទូកឃើញជួយស្រង់ឡើងលើទូក ដើម្បីជួយសង្គ្រោះ ចំណែក២នាក់ទៀតបានលិចបាត់តែម្តង ។
លោកវរសេនីយ៍ឯក អ៉ឹង ប៊ុន បានអោយសមត្ថកិច្ចខិតខំស្រង់រករហូតដល់ម៉ោង១៥និង១០នាទី ថ្ងៃខែឆ្នាំដដែល ក្រុមម៉ុចទឹករុករកបានរកឃើញ១នាក់ទៀតឈ្មោះសុខ សេដា ភេទប្រុស អាយុ៣៥ឆ្នាំ នឹងស្រាវជ្រាវរកសពក្មេងស្រីម្នាក់បន្តទៀត រហូតដល់ម៉ោង១៥និង៣០នាទីថ្ងៃដដែលបានរកឃើញ១នាក់ទៀត ឈ្មោះធូ វីយូហ្យា ភេទស្រី អាយុ១០ឆ្នាំ សរុបរកឃើញទាំងអស់ សពត្រូវបានសមត្ថកិច្ចធ្វើការពិនិត្យប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី ៕ ដោយ ៖ វណ្ណៈ
