សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖បុរសម្នាក់ស្រវឹងស្រាបេីករថយន្តដឹកដីក្នុងល្បឿនលឿនមកដល់ចំណុចផ្លូវកោងបួងចង្កូតមិនទាន់ជ្រុលទៅបុករថយន្តដឹកអេតចាយ រួចបន្តទៅបុករថយន្តឃ្លុបដឹកស្រាបៀរAnchorគាបតៃកុងជាប់ បង្កការភ្ញាក់ផ្អេីលដល់ប្រជាពលរដ្ឋជួយគាស់យកចេញកាលពីវេលាម៉ោង៤និង៤០នាទីរសៀលថ្ងៃទី៤ ខែកញ្ញា ឆ្នាំ២០២០ នៅចំណុចជិតទីលានប្រណាំងឡាន ស្ថិតក្នុងភូមិតាភេម សង្កាត់កំបូល ខណ្ឌកំបូល។
តាមសាក្សីនៅកន្លែងកេីតហេតុបានឱ្យដឹងថា មុនពេលកេីតហេតុគេបានឃេីញរថយន្តកូរ៉េដឹកអេតចាយ ពណ៌ខៀវ ពាក់ស្លាកលេខភ្នំពេញ2N-3675 បើកតាមបណ្តោយផ្លូវបេតុងក្នុងទិសដៅពីជេីងទៅត្បូង ខណៈមកដល់ចំណុចកេីតហេតុស្រាប់តែមានរថយន្តដឹកដីពណ៌ស ពាក់ស្លាកលេខកំពង់ចាម3A-7710 បេីកបរដោយបុរសម្នាក់ទាំងស្ថានភាពស្រវឹង ធ្វេីដំណេីរក្នុងទិសដៅពីត្បូងទៅជេីងក្នុងល្បឿនលឿនហេីយពេលបើកដល់ផ្លូវកោងបួងចង្កូតមិនទាន់ក៏ជ្រុលទៅបុករថយន្តដឹកអេតចាយពេញទំហឹងបណ្តាលឱ្យមានការខូចខាត។
សាក្សីដដែលបានបន្តថា បន្ទាប់មករថយន្តបង្កនៅមិនទាន់អស់ល្បឿនក៏បន្តទៅបុករថយន្តឃ្លុបដែលមានស្លាកយីហោស្រាបៀរAnchor ពាក់ស្លាកលេខភ្នំពេញ3D-1618 ដែលកំពុងធ្វេីដំណេីរបញ្ច្រាសទិសគ្នាចំពីមុខពេញទំហឹង បណ្តាលឱ្យគាបតៃកុងជាប់តែត្រូវបានប្រជាពលរដ្ឋជួយគាស់ចេញបានគឺគ្រាន់តែរងរបួសស្រាលប៉ុណ្ណោះ។
ក្រោយពេលកេីតហេតុសមត្ថកិច្ចបានឃាត់ម្ចាស់រថយន្តបង្កយកទៅសួរនាំចំណែករថយន្តទាំង៣គ្រឿងត្រូវបានសមត្ថកិច្ចធ្វេីការវាស់វែងយកទៅរក្សាទុកនៅអធិការដ្ឋាននគរបាលខណ្ឌកំបូលរង់ចាំដោះស្រាយតាមច្បាប់៕ដោយ ៖សុខាសែនជ័យ
