សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ រថយន្តកាមរីបាឡែនពណ៌ស ពាក់ស្លាកលេខ 2AA-6634មួយគ្រឿង ត្រូវបានអ្នកបេីកបរបញ្ជាចង្កូតជ្រុលទៅបុកជញ្ជាំងរបងផ្ទះប្រជាពលរដ្ឋ ហេីយក្រឡាប់ផ្ងារជើង នៅត្រង់ចំណុចភូមិបេង ឃុំសេដា ស្រុកតំបែរ ខេត្តត្បូងឃ្មុំ តែមិនបណ្តាលឲ្យ មានគ្រោះថ្នាក់ដល់ជីវិតមនុស្សទេ ដែលគ្រោះថ្នាក់នេះត្រូវបានគេអះអាងថារថយន្តរបស់កម្លាំងសមត្ថកិច្ចត្បាញអាយបេីកដេញរថយន្តសាំយ៉ុងដឹកឈើសង្ហារិមដើម្បីស្ទាក់យកលុយទុកត្រៀមយកទៅស៊ីចាយអំឡុងបុណ្យភ្ជុំបិណ្ឌខាងមុខនេះ។
យោងតាមប្រភពព័ត៌មានពីមហាជនបានលួចបង្ហេីបឱ្យដឹងថា មេៗនៅមន្ទីរកសិកម្ម រុក្ខាប្រមាញ់ និងនេសាទខេត្ត នាយខណ្ឌរដ្ឋបាលព្រៃឈើត្បូងឃ្មុំ បានលួចបញ្ចេញកម្លាំងក្រៅផ្លូវការចំនួន៣នាក់ ប្រេីប្រាស់រថយន្តកាមរីបាឡែន និងរថយន្តម៉ាកព្រូសចេញបង្ក្រាបតាមរយៈយកតួនាទីសមត្ថកិច្ចជំនាញជំរិតយកលុយពីអ្នករកស៊ីដឹកឈើសង្ហារិម ជូនលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្ត នាយខណ្ឌរដ្ឋបាលព្រៃឈើត្បូងឃ្មុំ និងសង្កាត់រដ្ឋបាលព្រៃឈើតំបែរ ម៉ាអេមហ្មង។
ប្រភពព័ត៌មានបង្ហេីបឱ្យដឹងទៀតថា
មានមនុស្សជំនិតៗ មេៗចំនួន៣នាក់ បានដាក់ពង្រាយក្នុងតំបន់ប្រតិបត្តិការទឹកដីស្រុកតំបែរ ដើម្បីប្រមូលសេដ្ឋកិច្ចជូនមេៗ ដោយមិនមានលិខិតបេសកកម្មអ្វីបន្តិចសោះឡើយ ។ ក្នុងនោះដែរ គេសង្កេតឃើញថា គណៈបញ្ជាការឯកភាពស្រុកតំបែរក៏មិនមានវិធានការទប់ស្កាត់អ្វីដែរ ព្រោះដឹងថាជាកម្លាំងរបស់មេៗ ខាងលើ ។
ជាក់ស្តែងនៅវេលាម៉ោង៣៖៣០នាទីទៀបភ្លឺ ឈានចូលថ្ងៃទី ៧ ខែកញ្ញា ឆ្នាំ២០២០ មានរថយន្តកាមរីបាឡែនពណ៌ស ពាក់ស្លាកលេខ 2AA.6634 បើកបរដោយឈ្មោះ សៅ សាំង បានបើកប្រដេញក្នុងល្បឿនលឿនដេញរថយន្តសាំយ៉ុងដឹកឈើសង្ហារិមហើយរេចង្កូតធ្លាក់ផ្លូវខ្លួនឯង ទៅបុកផ្ទះប្រជាពលរដ្ឋខ្មែរអ៊ិស្លាមក្រឡាប់ផ្ងារជើង នៅត្រង់ចំណុចភូមិបេង ឃុំសេដា ស្រុកតំបែរ ខេត្តត្បូងឃ្មុំ តែមិនបណ្តាលឲ្យមានគ្រោះថ្នាក់ដល់ជីវិតមនុស្សនោះទេ ។
បើតាមប្រភពព័ត៌មានពីពលរដ្ឋគឺម្ចាស់រថយន្តកាមរីបាឡែនពណ៌សខាងលើ មិនមែនជាមន្ត្រីសមត្ថកិច្ចជំនាញនោះទេ គឺប្រជាពលរដ្ឋស៊ីវិលសុទ្ធសាធ តែយកឈ្មោះអ្នកធំក្នុងខេត្តមកប្រើ។ មួយវិញទៀតបើតាមការបង្ហើបប្រាប់ពីពលរដ្ឋដែលសុំមិនបញ្ចេញឈ្មោះបញ្ជាក់ថា ម្ចាស់ឡានកាមរីបាឡែនខាងលើជារបស់ឈ្មោះ សៅ សាំង កន្លងមកមានការទំនាក់ទំនងជាមួយនឹងមន្ត្រីកងកម្លាំងប្រដាប់អាវុធ ពាក់ព័ន្ធជាមួយនឹងបទល្មើសព្រៃឈើ ក៏បានដើរធ្វើការជាមួយគ្នា ដើម្បីប្រមូលថវិកាឲ្យទៅលោកប្រធានមន្ទីរខាងលើ ។ ក្រៅពីឈ្មោះនេះក៏នៅមានឈ្មោះ ម៉េង ជិះរថយន្តកាមរីបាឡែនពណ៌ខ្មៅ គឺជាអ្នករកចំណូលឲ្យលោកនាយខណ្ឌរដ្ឋបាលព្រៃឈើត្បូងឃ្មុំ និងឈ្មោះ វ៉ា ហៅ”អាវ៉ែនតា” ក៏ជាអ្នកប្រមូលចំណូលឲ្យលោកនាយសង្កាត់រដ្ឋបាលព្រៃឈើតំបែរ ផងដែរ ។
នេះជាដំណឹង និងក៏ជាសំណូមពរពីប្រជារដ្ឋក្នុងស្រុកតំបែរ ស្នេីដល់គណៈមេបញ្ជាការឯកភាពខេត្តត្បូងឃ្មុំ មេត្តាប្រេី ជំនាញស៊េីបអង្កេត និងមានចំណាត់ការផង៕
ដោយ ៖ វណ្ណៈ
