សារព័ត៌មាន នគរវត្ត តែងតែនាំមុខគេជានិច្ច
អូស្រ្តាលី៖ នៅថ្ងៃទី១៣ ខែកញ្ញា ប៉ូលិសរដ្ឋ Victoria បានចាប់ខ្លួនមនុស្ស៧៤នាក់ និងផាកពិន័យ១៧៦នាក់ ដែលបានបំពានច្បាប់បម្រាមគោចរ ទប់ស្កាត់ឆ្លងរាលដាលកូវីដ-១៩។ ការចាប់ខ្លួននេះបានធ្វើឡើងក្រោយក្រុមបាតុករបន្តធ្វើបាតុកម្មឈានចូលថ្ងៃទី២។
រូបភាព ស្តីពីការធ្វើបាតុកម្មនៅតំបន់ផ្សារ Queen Victoria ជាទីតាំងតំណាងនៃទីក្រុង មែលប៊ន។ ក្រុមបាតុករបានប៉ះទង្គិចគ្នាជាមួយកម្លាំងប៉ូលិសទើបឈានដល់ការចាប់ខ្លួន។ តាមការលើកឡើងរបស់ប៉ូលិសរដ្ឋ Victoria បានឲ្យដឹងថា មានពលរដ្ឋប្រមាណ២០០-២៥០០នាក់ចូលរួមធ្វើបាតុកម្ម។ កាលពីថ្ងៃទី១២ ខែកញ្ញាប៉ូលិសបានចាប់ខ្លួនបាតុករ១២នាក់ផងដែរ។
សកម្មភាពធ្វើបាតុកម្មកើតឡើង ក្រោយពេលរដ្ឋវិចទ័ររៀ នឹងត្រូវលុបច្បាប់បម្រាមរឹតត្បិតចាប់ពីថ្ងៃទី១៤ខែកញ្ញា ក្រោយពេលមានករណីឆ្លងកូវីដ-១៩ថយចុះខ្លាំង។
នៅថ្ងៃទី១៣ខែកញ្ញា នៅក្នុងរដ្ឋវិចទ័ររៀ មានករណីឆ្លងកូវីដ-១៩ តែ៤១នាក់ប៉ុណ្ណោះ និង៧នាក់ស្លាប់ គឺថយចុះយ៉ាងខ្លាំង បើប្រៀបធៀបនឹងការឆ្លង៧០០នាក់ក្នុងមួយថ្ងៃ កាលពីខែសីហាកន្លងមក ។ ចំនួនអ្នកឆ្លងកូវីដ-១៩នៅក្នុងរដ្ឋនេះមានដល់ទៅ៧៥ភាគរយនៃចំនួនអ្នកឆ្លងទូទាំងប្រទេស។ គិតមកដល់បច្ចុប្បន្ននៅទូទាំងប្រទេសអូស្ត្រាលីមានករណីឆ្លងសរុបដល់ទៅជាង២៦.៦០០នាក់ និងស្លាប់៨១០នាក់៕ដោយ៖ធី រីណា
