សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ដើម្បីដោះស្រាយបញ្ហាអត្រាកំណើតទារករបស់ប្រជាជនខ្លួនរដ្ឋាភិបាលជប៉ុន បានសម្រេចឧបត្ថម្ភលុយមួយផ្នែកនៃកម្មវិធីគាំទ្រអ្នករៀបការថ្មីថ្មោង ការចាប់ពីខែមេសា ឆ្នាំ២០២១ខាងមុខនេះតទៅ ។ ដោយគូស្វាមីភរិយា នឹងមានលទ្ធភាពទទួលបានប្រាក់ឧបត្ថម្ភរហូតដល់ ៦០ម៉ឺនយេន (ជាង៥៧៥៣ដុល្លារ) ដើម្បីចែតចាត់ការចំណាយផ្សេងៗ ខណៈពួកគេត្រៀមចាប់ផ្ដើមជីវិតគ្រួសារ។
បើតាមប្រភពព័ត៍មានពីរដ្ឋាភិបាលជប៉ុន ដែលដកស្រង់ចុះផ្សាយដោយទីភ្នាក់ងារព័ត៌មាន Kyodo នៅថ្ងៃទី២០ ខែកញ្ញា ឆ្នាំ២០២០ថា៖ ជប៉ុនកំពុងជួបប្រទះបញ្ហាអត្រាកំណើតទាប ដែលបង្កឡើងមួយផ្នែកធំដោយនិន្នាការប្រជាជនជប៉ុន ដែលរៀបការយឺត ឬសម្រេចមិនរៀបការតែម្ដង។បន្ទាប់ពីមើលឃើញថា បញ្ហាចាក់ឫសជ្រៅក្នុងសង្គមជប៉ុនបែបនេះរដ្ឋាភិបាលជប៉ុន នឹងព្យាយាមលើកទឹកចិត្តឲ្យពលរដ្ឋខ្លួនរៀបការដោយការដាក់ចេញកម្មវិធីឧបត្ថម្ភគាំទ្រដល់អនាគតគូស្វាមីភរិយាជប៉ុន ។
ទីភ្នាក់ងារព័ត៌មាន Kyodo បន្តថា ដើម្បីមានសិទ្ធិចូលរួមក្នុងកម្មវិធីនេះ ទាំងប្ដី និងប្រពន្ធជនជាតិជប៉ុន ត្រូវតែមានអាយុតិចជាង ៤០ឆ្នាំ គិតត្រឹមថ្ងៃចុះឈ្មោះរៀបការ។ លក្ខខណ្ឌមួយទៀត គឺ អ្នកទាំងពីរ ត្រូវមានប្រាក់ចំណូលប្រចាំឆ្នាំសរុបចូលគ្នាទាបជាង ៥,៤លានយេន ឬជាង៥ម៉ឺនដុល្លារ។
ហេតុផលនោះគឺ ទីក្រុងទាំងនេះ ត្រូវបង់ពាក់កណ្ដាលនៃការចំណាយក្នុងកម្មវិធីនេះ។ យ៉ាងណាមិញ បើគិតត្រឹមខែកក្កដា ឆ្នាំ២០២០កន្លងទៅការអនុវត្តកម្មវិធីគាំទ្រហិរញ្ញវត្ថុនេះ ពុំទាន់ត្រូវបានធ្វើឡើងទូទាំងប្រទេសនៅឡើយទេ ពោលគឺមានតែ១៥ភាគរយប៉ុណ្ណោះក្នុងចំណោមទីក្រុងសរុបរបស់ប្រទេសជប៉ុន។
សូមជម្រាបថា រដ្ឋាភិបាលកណ្ដាលជប៉ុន នឹងចេញថ្លៃចំណាយរហូតដល់២ភាគ៣នៃការចំណាយសរុបក្នុងកម្មវិធីនេះវិញ ដែលនឹងយកចេញពីកញ្ចប់ថវិកាជាតិ ឆ្នាំ២០២១ ខាងមុខ។ នេះគឺដើម្បីលើកទឹកចិត្តឲ្យទីក្រុងជប៉ុនច្រើនថែមទៀតអនុវត្តកម្មវិធីគាំទ្រគូស្វាមីភរិយាថ្មីថ្មោងនេះ។ ដោយក្នុងកម្មវិធីនេះ គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលជប៉ុនក្នុងគោលដៅដោះស្រាយបញ្ហាអត្រាកំណើតទាបក្នុងប្រទេស ខណៈមានទារកទត្រឹម៨៦៥ ០០០នាក់ ប៉ុណ្ណោះ ចាប់កំណើតក្នុងឆ្នាំ២០១៩ ដែលជាតួលេខទាបបំផុត។
គួរបញ្ជាក់ថា បើតាមការស្ទង់មតិក្នុងឆ្នាំ២០១៥ ដោយវិទ្យាស្ថានជាតិសន្តិសុខសង្គមនិងប្រជាជនជប៉ុន ក៏បានបញ្ជាក់ដែរថា ការផ្ដល់លុយឧបត្ថម្ភបែបនេះ គឺជាវិធីសាស្ត្រមានប្រសិទ្ធភាពក្នុងការលើកទឹកចិត្តឲ្យប្រជាជនរៀបការ ព្រោះថា បុរសជប៉ុននៅលីវអាយុចន្លោះ២៥–៣៤ឆ្នាំប្រមាណ២៩ភាគរយ និងស្ត្រីជប៉ុននៅលីវប្រមាណ១៧,៨ភាគរយ បានលើកឡើងពីបញ្ហាខ្វះខាតលុយកាក់ជាមូលហេតុដែលពួកគេសម្រេចមិនរៀបការ ៕
ដោយ៖ស តារា
