ព័ត៌មានទាន់ហេតុការណ៍៖

រោងចក្រផលិតស្បែកជេីងមួយកន្លែងក្នុងខណ្ឌពោធិ៍សែនជ័យ​ត្រូវអគ្គិភ័យឆាបឆេះយ៉ាងសន្ធោសន្ធៅ

ចែករំលែក៖

ភ្នំពេញ​ ៖​ អគ្គិភ័យបានឆាបឆេះរោងចក្រផលិតស្បែកជេីង​ ​វ៉ុលស្កូ​ អុិនធេីណេសិនណល​ ស្ថិតក្នុងភូមិត្រពាំងពោធិ៍​ សង្កាត់ចោមចៅទី៣​ ខណ្ឌពោធិ៍សែនជ័យ​យ៉ាងសន្ធោសន្ធៅ​ បង្កការភ្ញាក់ផ្អេីលដល់ប្រជាពលរដ្ឋនិងសមត្ថកិច្ចនាវេលាម៉ោង​ ២​ រំលងអធ្រាត្រ​ ឈានចូលថ្ងៃទី​២៦​ ខែកញ្ញា​ ឆ្នាំ​២០២០​ ។

​ តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកេីតហេតុបានឲ្យដឹងថា​ រោងចក្រផលិតស្បែកជេីងខាងលេីគឺមានកម្មករធ្វេីការតែពេលថ្ងៃទេ​ ហេីយនៅយប់កេីតហេតុស្រាប់តែឮសំឡេងផ្ទុះពីក្នុងរោងចក្រ។ មួយសន្ទុះក្រោយក៏មានផ្សែងហុយខ្មួលខ្មាញ់ចេញពីក្នុងរោងចក្រ​ និងមានអណ្ដាតភ្លេីងឆេះឡេីងយ៉ាងសន្ធោសន្ធៅតែម្ដង​ ។

​ ពេលមានភ្លេីងឆេះរោងចក្រខាងលេី​ ប្រជាពលរដ្ឋក៏បានទាក់ទងទៅសមត្ថកិច្ចមូលដ្ឋាន​ឲ្យជួយធ្វើអន្តរាគមន៍ភ្លាមៗ​ ដោយមានរថយន្តពន្លត់អគ្គិភ័យជាច្រេីនរបស់អង្គភាពនៅក្នុងរាជធា​នីភ្នំពេញ​​បានចុះមកជួយបាញ់ទឹកពន្លត់យ៉ាងញាប់ដៃញាប់ជេីង។

​ ចំពោះករណីអគ្គិភ័យខាងលេីនេះ​ សមត្ថកិច្ចជំនាញមិនទាន់បញ្ជាក់ពីមូលហេតុបាននោះទេ ចំណែកមនុស្សក៏មិនមានផលប៉ះពាល់ដល់នរណាម្នាក់នោះដែរ​ រហូតមកដល់ម៉ោងជាង៤ជិតភ្លឺទៅហេីយក៏មិនទាន់រលត់ទៅវិញ​ដែរ ៕ដោយ៖​ ភារ៉ា​ ដង្កោ​


ចែករំលែក៖