សារព័ត៌មាន នគរវត្ត តែងតែនាំមុខគេជានិច្ច
នាយករដ្ឋមន្ត្រីថ្មីជប៉ុនបានប្រកាសថា លោកបានត្រៀមខ្លួនដើម្បីជួបពិភាក្សាជាមួយមេដឹកនាំកូរ៉េខាងជើង ដើម្បីបង្កើនទំនាក់ទំនងទ្វេភាគី ដោយគ្មានលក្ខខណ្ឌណាមួយនោះឡើយ ។
នៅក្នុងសារ «វីដេអូ» ដែលបានផ្ញើទៅកាន់មហាសន្និបាតអង្គការសហប្រជាជាតិ កាលពីថ្ងៃទី២៥ ខែកញ្ញា នាយករដ្ឋមន្ត្រីជប៉ុនលោកYoshihide Suga បានប្រកាសថា លោកបានត្រៀមលក្ខណៈរួចរាល់ហើយដើម្បីជួបពិភាក្សាជាមួយលោកគីម ជុងអ៊ុនដោយគ្មានលក្ខខណ្ឌ។
លោកYoshihide Suga បានបញ្ជាក់នៅក្នុងឃ្លីបវីដេអូផ្ញើទៅកាន់មហាសន្និបាតអង្គការសហប្រជាជាតិលើកទី៧៥ ដោយលោកបានបញ្ជាក់ថា«ក្នុងនាមជានាយករដ្ឋមន្ត្រីជប៉ុន ខ្ញុំបានត្រៀមខ្លួនជួបពិភាក្សាជាមួយមេដឹកនាំកូរ៉េខាងជើង គីម ជុងអ៊ុន គ្រប់ពេល ដោយគ្មានលក្ខខណ្ឌ។
នាយករដ្ឋមន្ត្រី Yoshihide Suga បានបញ្ជាក់ថា នឹងបង្កើនទំនាក់ទំនងដែលមានលក្ខណៈស្ថាបនារវាងជប៉ុននិឹងកូរ៉េខាងជើង ដើម្បីផលប្រយោជន៍ទាំងសងខាងនិងចូលរួមថែរក្សាសន្តិភាព សន្តិសុខនៅក្នុងតំបន់។
បច្ចុប្បន្ន កូរ៉េខាងជើង និងជប៉ុន មិនទាន់មានទំនាក់ទំនងការបរទេសទេ ប៉ុន្តែប្រទេសទាំងពីរនៅតែរក្សាទំនាក់ទំនងពិភាក្សាគ្នាលើបញ្ហាមួយចំនួន។ រដ្ឋាភិបាលទីក្រុងតូក្យូក៏បានបង្ហាញពីក្តីបារម្ភពីកម្មវិធីបរមាណូ និងមីស៊ីលរបស់កូរ៉េខាងជើងផងដែរ៕ដោយ៖ធី រីណា
