សារព័ត៌មាន នគរវត្ត តែងតែនាំមុខគេជានិច្ច
រដ្ឋមន្ត្រីក្រសួងការពារជាតិប្រទេសអាហ្វ្រិកខាងត្បូង ត្រូវបានប្រធានាធិបតីផាកពិន័យ កាត់ប្រាក់ខែ៣ខែ ដោយសារតែប្រើប្រាស់យន្តហោះយោធា ហើយអនុញ្ញាតឲ្យអ្នកគ្មានភារកិច្ចចូលរួមធ្វើដំណើរតាមយន្តហោះនោះទៅកាន់ប្រទេសហ្ស៊ីមបាវេ (Zimbabwe)។
សារព័ត៌មានរ៉យទ័របានផ្សាយថា ការិយាល័យរដ្ឋមន្ត្រីក្រសួងការពារជាតិអាហ្វ្រិកខាងត្បូងបានប្រកាសឲ្យដឹងថា ប្រធានាធិបតីCyril Ramaphosa បានស្តីបន្ទោសរដ្ឋមន្ត្រីក្រសួងការពារជាតិលោកស្រី Nosiviwe Mapisa-Nqakula ហើយបានកាត់ប្រាក់ខែ៣ខែ ដោយសារតែគាត់អនុញ្ញាតឲ្យគណៈប្រតិភូទៅកាន់ប្រទេសហ្ស៊ីមបាវេជិះយន្តហោះរបស់កម្លាំងទាហានអាកាស។
ប្រធានាធិបតីCyril Ramaphosa បានបញ្ជាក់ថា «រដ្ឋមន្ត្រីក្រសួងការពារជាតិបានទទួលរងការស្តីបន្ទោស ហើយត្រូវកាត់ប្រាក់ខែ៣ខែគិតចាប់ពីថ្ងៃទី១ខែវិច្ឆិកាទៅ។ មិនតែប៉ុណ្ណោះ រដ្ឋមន្ត្រីការពារជាតិ ក៏ត្រូវសងសំណងពីការចំណាយដល់ជើងហោះហើរនោះដែរ។
ប្រធានាធិបតី អាហ្វ្រិកខាងត្បូងបានបញ្ជាក់ថា រដ្ឋមន្ត្រីការពារជាតិ មានដំណើរទស្សនកិច្ចជាផ្លូវការទៅកាន់ប្រទេសហ្ស៊ីមបាវេ ប៉ុន្តែការអនុញ្ញាតឲ្យអ្នកមិនជាប់ពាក់ព័ន្ធធ្វើដំណើរតាមយន្តហោះគឺជាការខុសឆ្គងខ្លាំង៕ដោយ៖ធី រីណា
