សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសម្នាក់បើកម៉ូតូមិនប្រយ័ត្ន បានរេចង្កូតជ្រុលទៅបុករថយន្តមួយគ្រឿងបណ្ដាលឲ្យស្លាប់បាត់បង់ជីវិតនៅនឹងកន្លែងកើតហេតុ ។ ហេតុការណ៍គ្រោះថ្នាក់ចរាចរណ៍នេះ បានកើតឡើង នៅថ្ងៃទី២៩ ខែកញ្ញា ឆ្នាំ២០២០ វេលាម៉ោង១៨និង៣០នាទី នៅលើផ្លូវលេខ១២១០ ស្ថិតក្នុងភូមិគោកសណ្ដែក ឃុំស្អាងភ្នំ ស្រុកស្អាង ខេត្តកណ្តាល។
មន្ត្រីនគរបាលចរាចរណ៍ស្រុកស្អាងបានឲ្យដឹងថា ជនរងគ្រោះស្លាប់បាត់បង់ជីវិតឈ្មោះ ញ៉ សុីដា ភេទប្រុស អាយុ៣៦ឆ្នាំ មានទីលំនៅភូមិព្រែកអ៉ុងប៉ាង ឃុំទឹកវិល ស្រុកស្អាង ខេត្តកណ្ដាល មានមុខរបរលក់បន្លែ បើកម៉ូតូម៉ាកPCX ពណ៌សលាយក្រហម ពាក់ស្លាកលេខ ភ្នំពេញ1PP-0382 ។ ចំណែកភាគីខាងរថយន្តម៉ាកសាំយ៉ុង ពណ៌លឿង ពាក់ស្លាកលេខភ្នំពេញ 2AO-9472 អ្នកបើកបរមិនស្គាល់អត្តសញ្ញាណ(រត់គេចខ្លួនបាត់ស្រមោល)។
ប្រភពដដែលបន្តថា នៅថ្ងៃខែឆ្នាំកើតហេតុ ឈ្មោះ ញ៉ សុីដា ភេទប្រុស អាយុ៣៦ឆ្នាំ មានទីលំនៅភូមិព្រែកអុងប៉ាង ឃុំទឹកវិល ស្រុកស្អាង ខេត្តកណ្ដាល មុខរបរលក់បន្លែ បានបើកម៉ូតូ ម៉ាកPCX ពណ៌សលាយក្រហម ពាក់ស្លាកលេខ ភ្នំពេញ1PP-0382 (ស្លាប់នៅកន្លែងកើតហេតុ) មិនពាក់មួកសុវត្ថិភាព បានបើកបរក្នុងទិសដៅពីជើងទៅត្បូង។ ពេលបើកមកដល់កន្លែងកើតហេតុ ក៏បានរេចង្គួតទៅបុកជាមួយរថយន្ដម៉ាកសាំយ៉ុង ពណ៌លឿង ពាក់ស្លាកលេខភ្នំពេញ 2AO-9472 ដែលកំពុងបើកបញ្ច្រាសទិសគ្នាពីត្បូងទៅជើង បណ្ដាលឱ្យដួលម៉ូតូធ្វើឱ្យអ្នកបើកបរម៉ូតូនេះស្លាប់នៅនឹងកន្លែងកើតហេតុ។
ក្រោយពេលកើតហេតុអ្នកបើកបររថយន្ដបានទុករថយន្តចោល រួចរត់គេចខ្លួនបាត់។ បន្ទាប់ពីបានទទួលព័ត៌មានខាងលើនេះភ្លាម សមត្ថកិច្ចបានចុះមកពិនិត្យ និងវាស់វែងកន្លែងកើតហេតុ និងយកវត្ថុតាងទាំងពីរយកមករក្សាទុកនៅអធិការដ្ឋានស្រុកស្អាង ដើម្បីកសាងសំណុំរឿងតាមនីតិវិធីនៃច្បាប់។ ចំណែកសាកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕ដោយ៖ស្អាង ជ័យ
