សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖បុរសជាជនពិការដៃម្នាក់បានបោកក្បាលស្លាប់ភ្លាមៗនៅនឹងកន្លែងខណៈជិះម៉ូតូមិនប្រយ័ត្នជ្រុលទៅបុកបង្គោលចំណាំងផ្លាតតាមផ្លូវបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរចោមរោមមើលនិងរាយការណ៍ទៅសមត្ថកិច្ចស្រុករមាសហែកកាលពីវេលាម៉ោង ២និង៤៥នាទីរសៀលថ្ងៃទី៧ ខែតុលា ឆ្នាំ២០២០ នៅចំណុចភូមិអណ្ដូងត្របែក ឃុំអណ្ដូងត្របែក ស្រុករមាសហែក ខេត្តស្វាយរៀង។
តាមសមត្ថកិច្ចនគរបាលស្រុករមាសហែកបានឲ្យដឹងថា ជនរងគ្រោះមានឈ្មោះ ធូ សុភាព អាយុ៤៨ឆ្នាំ មុខរបរកសិករ(ជនពិការដៃខាងស្ដាំ)រស់នៅចំណុចផ្ទះ៤០០ខ្នងដំបូលខៀវស្ថិតនៅក្នុងភូមិជីកដី ឃុំអណ្ដូងត្របែក ស្រុករមាសហែកខេត្តស្វាយរៀង។
តាមសាក្សីបានឲ្យដឹងថា មុនកើតហេតុគេឃើញបុរសពិការដៃខាងស្ដាំនេះបានជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅពាក់ស្លាកលេខកំពង់ចាម១N-៨៦៩៤ក្នុង ទិសដៅពីជើងទៅត្បូង(ពុំពាក់មួកសុវត្ថិភាព) ហើយខណៈនោះមិនដឹងជាយ៉ាងម៉េចស្រាប់តែជិះបុកបង្គោលចំណាំងផ្លាតត្រង់ចន្លោះគីឡូម៉ែត្រលេខ៥៧-៥៨យ៉ាងពេញទំហឹងបណ្ដាលឱ្យដួលបែកក្បាលស្លាប់នៅនឹងកន្លែងបង្កការភ្ញាក់ផ្អើលតែម្ដង។
ក្រោយពីពិនិត្យសាកសពរួចសមត្ថកិច្ចនគរបាលស្រុករមាសហែកបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត៕ យឹម សុថាន
