នារីជំទង់ម្នាក់ដើរធ្លាក់ចូលលូប្រឡាយស្លាប់យ៉ាងអាណោចអាធ័ម

ចែករំលែក៖

ខេត្តបន្ទាយមានជ័យ ៖ នារីវ័យជំទង់ម្នាក់ខណ:ដើរទៅមើលទឹកស្រែជាមួយជីតានិងបងប្រុស២នាក់ ទៀត ស្រាប់តែដើរធ្លាក់ចូលក្នុងលូប្រឡាយបណ្តាលឲ្យលង់ស្លាប់យ៉ាងអាណោចអាធ័ម។
ហេតុការណ៍នេះកើតឡើងនៅវេលាម៉ោង១រសៀល ថ្ងៃទី៩ ខែតុលា ឆ្នាំ ២០២០ នៅចំណុចភូមិកស្វាយ ចម្ងាយ៥០០ម៉ែត្រ ហៅប្រឡាយតូ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ។

មន្រ្តីនគរបាលស្រុកមង្គលបូរីបានប្រាប់ឲ្យដឹងថាជនរងគ្រោះមានឈ្មោះអ៊ុ វណ្ណរួយ ភេទស្រី អាយុ១៧ឆ្នាំ នៅភូមិកស្វាយ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ។នៅមុនពេលកើតហេតុនោះជនរងគ្រោះបានដើរទៅស្រែ៣នាក់ជីតា និងបងប្រុស២នាក់ទៀតឈ្មោះ វណ្ណរួយ និងឈ្មោះ វណ្ណនីន ដើម្បីទៅមើលទឹកស្រែនៅចម្ងាយពីកន្លែងកើតហេតុប្រហែល៣០០ម៉ែត្រ។ពេលទៅដល់ស្រែជីតានិងបងប្រុសពីរនាក់ទៀតបានវិលត្រឡប់មកផ្ទះវិញ លុះពេលមកដល់ពាក់កណ្ដាលផ្លូវមិនឃើញប្អូនស្រីរងគ្រោះមកពីក្រោយ។ ភ្លាមនោះដែរគាត់ក៏ទៅរកស្រាប់តែប្រទះឃើញប្អូនស្រីធ្លាក់ចូលនឹងលូទឹកប្រឡាយហើយពេលឃើញដូច្នេះជីតាបានចុះរាវក្នុងទឹកក៏ឃើញជនរងគ្រោះហើយក៏បីមកដាក់លើគោកជួយសង្គ្រោះតែអនិច្ចាក្មេងស្រីនោះបានស្លាប់បាត់បង់ជីវិតបាត់ទៅហើយ។
ក្រោយមកដាសពត្រូវបានបងប្រុសនិងជីតាបីយកមកផ្ទះដើម្បីចាត់ចែងធ្វើបុណ្យតាមប្រពៃណី៕