សារព័ត៌មាន នគរវត្ត តែងតែនាំមុខគេជានិច្ច
គណៈបញ្ជាការគ្រប់គ្រងទប់ស្កាត់ជំងឺឆ្លងវៀតណាម បានប្រកាសឲ្យដឹងនៅល្ងាចថ្ងៃទី២១ខែតុលា ថា បានរកឃើញមានករណីឆ្លងថ្មី៣នាក់ គឺចូលពីប្រទេសរុស្ស៊ី និង អង់ហ្គោឡា (Angola) ដែលបានធ្វើចត្តាឡីស័ក។ មកទល់ពេលនេះវៀតណាមមានករណីឆ្លងសរុប១១៤៤នាក់។
ក្នុងចំណោមអ្នកឆ្លង៣នាក់ គឺមានពីរនាក់ម្តាយនឹងកូនមកពីប្រទេសអង់ហ្គោឡា និងម្នាក់មកពីប្រទេសរុស្ស៊ី។ ចំណែកនៅទូទាំងប្រទេសវៀតណាមវិញ គិតដល់វេលាម៉ោង១៨ ថ្ងៃទី២១ខែតុលា មានករណីឆ្លងសរុបនៅទូទាំងប្រទេស ១១៤៤នាក់ ក្នុងនោះមាន ៦៩១នាក់ ឆ្លងក្នុងសហគមន៍ ក្នុងនោះមាន ករណីឆ្លងលើកទីពីរចាប់ពីថ្ងៃទី ២៥ខែកក្កដា ដល់ពេលនេះ មានដល់ទៅ៥៥១នាក់។ ក្រៅពីនេះគឺអ្នកឆ្លងចូលមកពីក្រៅប្រទេសទាំងអស់។
បច្ចុប្បន្នវៀតណាម នៅមានពលរដ្ឋចូលមកពីតំបន់ឆ្លងកូវីដ-១៩ ត្រូវធ្វើចត្តាឡីស័ក មានរហូតដល់ទៅ១៣.៩២៩នាក់ ក្នុងតំបន់ផ្សេងៗគ្នាដើម្បីតាមដានសុខភាព។ វៀតណាមក៏មានករណីស្លាប់៣៥នាក់ និងអ្នកជំងឺព្យាបាលជាសះស្បើយមាន១០៤៦នាក់ផងដែរ។
វៀតណាមជាប្រទេស ដែលត្រូវបានសហគមន៍អន្តរជាតិទទួលស្គាល់ថាជា ប្រទេសដែលទប់ស្កាត់ការឆ្លងកូវីដ-១៩ បានល្អបំផុត ដោយមិនមានករណីឆ្លងច្រើនគ្នុងសហគមន៍នោះឡើយ។ មកទល់ពេលនេះនៅទាំងពិភពលោក មានករណីឆ្លង កើនឡើងដល់ទៅជាង៤១លាននាក់ និងស្លាប់ជាង១,១លាននាក់ ។ ជាមួយគ្នានោះក៏មានអ្នកព្យាបាលជាសះស្បើយកើនឡើងដល់ទៅ ជាង៣០,៦លាននាក់ផងដែរ៕ដោយ៖ធី រីណា
