សារព័ត៌មាន នគរវត្ត តែងតែនាំមុខគេជានិច្ច
អាមេរិកបានខិតខំបញ្ចុះបញ្ជូលសម្ពន្ធមិត្តឲ្យបោះបង់ក្រុមហ៊ុនបច្ចេកវិទ្យារបស់ចិនគឺក្រុមហ៊ុនហួវៃ ក្នុងការបំពាក់សេវាអត់ខ្សែ5G នៅក្នុងប្រទេសនេះ។
នៅក្នុងដំណើរទស្សនកិច្ចទៅកាន់ប្រទេសប្រេស៊ីល មន្ត្រីធនាគារនាំចេញនាំចូលអាមេរិក (EXIM) និងរដ្ឋាភិបាលអាមេរិក បានចុះហត្ថលេខាលើកំណត់ហេតុ ដោយក្នុងនោះអាមេរិកសន្យាផ្តល់ជំនួយ១ពាន់លានដុល្លារដល់ប្រេស៊ីល។ ប្រាក់ជំនួយទាំងនោះគឺផ្តល់ទៅលើថាមពលប្រព័ន្ធទូរគមនាគមន៍ពិសេសគឺបណ្តាញសេវា 5G ផងដែរ។
រដ្ឋាភិបាលទីក្រុងវ៉ាស៊ីនតោនបានបញ្ជាក់ថា ក្រុមហ៊ុនហួវៃគឺជាការគំរាមកំហែងដល់សន្តិសុខជាតិ ហើយបានប្រមូលទិន្នន័យរបស់ពលរដ្ឋ និងប្រទេសផ្សេងទៀតផ្តល់ឲ្យរដ្ឋាភិបាលទីក្រុងប៉េកាំង។ ប៉ុន្តែក្រុមហ៊ុនហួវៃបានច្រានចោលរាល់ការចោទប្រកាន់ទាំងនោះ។
ដើម្បីពង្រឹងឥទ្ធិពលរបស់ខ្លួន អាមេរិកបានខិតខំបញ្ចុះបញ្ជូលសម្ពន្ធមិត្តនៅជុំវិញពិភពលោកឲ្យបោះបង់ក្រុមហ៊ុនហួវៃរបស់ចិន។ ប្រទេសអឺរ៉ុបមួយចំនួនបានបោះបង់ក្រុមហ៊ុនហួវៃ មិនអនុញ្ញាតឲ្យចូលរួមនៅក្នុងកម្មវិធីបង្កើតសេវាល្បឿនលឿន5Gនោះឡើយ ក្នុងនោះមានអង់គ្លេស ជាដើម។ កាលពីថ្ងៃទី២០ខែតុលា ប្រទេសស៊ុយអែត គឺជាប្រទេសថ្មីបំផុតដែលសម្រេចបោះបង់ហួវៃ តាមសំណើអាមេរិក៕ដោយ៖ធី រីណា
