សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អាជ្ញាធរខណ្ឌពោធិ៍សែនជ័យបានចុះវាស់វែងលើកំណាត់ផ្លូវនៅក្នុងបុរីពិភពថ្មីនិងបុរីពិភពថ្មី២ ក្នុងភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ នាព្រឹកថ្ងៃទី២៩ ខែតុលា ឆ្នាំ២០២០នេះ និងដាក់លិខិតឲ្យរុះរើសំណង់បន្ថែមដោយទុករយៈពេល១០ថ្ងៃ ។
អាជ្ញាធរបានឲ្យដឹងថា ដោយសង្កេតឃើញថា ម្ចាស់បុរី និងបងប្អូនប្រជាពលរដ្ឋដែលរស់នៅក្នុងបុរីបានធ្វើការសាងសង់សំណង់បន្ថែមនៅលើសំណង់ចាស់ដែលមានស្រាប់ខុសពីច្បាប់អនុញ្ញាតឲ្យសាងសង់ ។ ម្យ៉ាងវិញទៀត ម្ចាស់បុរីមិនបានយកចិត្តទុកដាក់ក្នុងការកែលម្អប្រព័ន្ធលូបង្ហូរទឹករហូតទៅដល់បងប្អូនប្រជាពលរដ្ឋខ្លះបានធ្វើការសាងសង់សំណង់ផ្សេងៗបិទអណ្ដូងលូ និងប្រព័ន្ធលូបង្ហូរទឹកថែមទៀត ។
អាស្រ័យដូច្នេះ ដើម្បីចូលរួមការស្ដារអណ្ដូងលូ និងកែលម្អប្រព័ន្ធលូឡើងវិញ ចៀសវាងការជន់លិចដោយសារទឹកភ្លៀង ឫទឹកជំនន់ផ្សេងៗ អាជ្ញាធរបានស្នើដល់ម្ចាស់បុរី និងបងប្អូនប្រជាពលរដ្ឋទាំងអស់ ដែលរស់នៅក្នុងបុរី ចូលរួមរក្សាឲ្យបាននូវស្ថានភាពដើម មិនត្រូវសាងសង់បន្ថែម និងត្រូវរុះរើសំណង់នានាដែលបានសង់រំលោភលើចិញ្ចើមផ្លូវ និងអណ្ដូងលូចេញឲ្យអស់ចាប់ពីថ្ងៃជូនដំណឹងនេះតទៅ ។
ក្នុងករណីអស់លោកលោកស្រីបងប្អូនពលរដ្ឋមិនអនុវត្តតាមការជូនដំណឹងខាងលើនេះទេ រដ្ឋបាលខណ្ឌពោធិ៍សែនជ័យនឹងមានវិធានការចុះរុះរើ ដោយមិនទទួលខុសត្រូវលើការបាត់បង់ ខូចខាតទ្រព្យសម្បត្តិ និងសម្ភារផ្សេងៗ ដែលមាននៅលើទីតាំងនោះឡើយ ។
បើតាមមន្ទីរសាធារណការរាជធានីភ្នំពេញ បានឲ្យដឹងថា ក្រោយការបូមទឹកចេញពីក្នុងបុរីឃើញថា មកដល់ពេលនេះ ស្ថានភាពទឹកបានស្រកអស់ពីក្នុងបុរីហើយ ។ប៉ុន្តែអ្វីដែលនៅសេសសល់ គឺក្រុមការងារកំពុងបន្តបូមស្តារលូ បាញ់ទឹកលាងសម្អាត កើបសម្អាតភក់ សំរាម និងបាញ់ថ្នាំសម្លាប់មេរោគជូនបងប្អូនប្រជាពលរដ្ឋក្នុងបុរី ដែលខណៈនេះមានប្រជាពលរដ្ឋប្រមាណ៩០% បានមកចូលរស់នៅតាមលំនៅឋានជាធម្មតាហើយ ៕
ដោយ៖សុខា សែនជ័យ
